[571] Atthi arahato paravitāraṇāti . āmantā . nanu vuttaṃ bhagavatā yasmiṃ bhikkhave samaye ariyasāvakassa virajaṃ vītamalaṃ dhammacakkhuṃ udapādi yaṃ kiñci samudayadhammaṃ sabbantaṃ nirodhadhammanti saha dassanuppādā bhikkhave ariyasāvakassa tīṇi saññojanāni pahīyanti sakkāyadiṭṭhi vicikicchā sīlabbataparāmāsoti attheva suttantoti . Āmantā. Tena hi na vattabbaṃ atthi arahato paravitāraṇāti.

[572] Atthi arahato paravitāraṇāti . āmantā . nanu vuttaṃ bhagavatā nāhaṃ gamissāmi pamocanāya kathaṃkathiṃ dhotaka kañci loke Dhammañca seṭṭhaṃ abhijānamāno evaṃ tuvaṃ oghamimantaresīti attheva suttantoti . āmantā . tena hi na vattabbaṃ atthi arahato paravitāraṇāti.

[573] Na vattabbaṃ atthi arahato paravitāraṇāti . Āmantā. Nanu arahato itthīpurisānaṃ nāmagottaṃ pare vitāreyyuṃ maggāmaggaṃ pare vitāreyyuṃ tiṇakaṭṭhavanappatīnaṃ nāmaṃ pare vitāreyyunti . Āmantā . hañci arahato itthīpurisānaṃ nāmagottaṃ pare vitāreyyuṃ maggāmaggaṃ pare vitāreyyuṃ tiṇakaṭṭhavanappatīnaṃ nāmaṃ pare vitāreyyuṃ tena vata re vattabbe atthi arahato paravitāraṇāti.

[574] Arahato itthīpurisānaṃ nāmagottaṃ pare vitāreyyuṃ maggā maggaṃ pare vitāreyyuṃ tiṇakaṭṭhavanappatīnaṃ nāmaṃ pare vitāreyyunti atthi arahato paravitāraṇāti . āmantā . arahato sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā pare vitāreyyunti. Na hevaṃ vattabbe .pe. Paravitāraṇākathā. --------