[591] Samāpannassa atthi vacībhedo ñāṇaṃ saccagocaraṃ sotaṃ saddagocaranti . āmantā . hañci ñāṇaṃ saccagocaraṃ sotaṃ saddagocaraṃ no vata re vattabbe samāpannassa atthi vacībhedoti.

[592] Samāpannassa atthi vacībhedo ñāṇaṃ saccagocaraṃ sotaṃ saddagocaranti . āmantā . davinnaṃ phassānaṃ dvinnaṃ vedanānaṃ dvinnaṃ saññānaṃ dvinnaṃ cetanānaṃ dvinnaṃ cittānaṃ samodhānaṃ hotīti . Na hevaṃ vattabbe .pe.

[593] Samāpannassa atthi vacībhedoti . āmantā . Paṭhavīkasiṇaṃ samāpattiṃ samāpannassa atthi vacībhedoti. Na hevaṃ vattabbe .pe.

[594] Samāpannassa atthi vacībhedoti . āmantā. Āpokasiṇaṃ .pe. tejokasiṇaṃ vāyokasiṇaṃ nīlakasiṇaṃ pītakasiṇaṃ lohitakasiṇaṃ odātakasiṇaṃ samāpattiṃ .pe. ākāsānañcāyatanaṃ viññāṇañcāyatanaṃ ākiñcaññāyatanaṃ .pe. Nevasaññānāsaññāyatanaṃ samāpannassa atthi vacībhedoti. Na hevaṃ vattabbe .pe.