[619] Na vattabbaṃ samāpannassa atthi vacībhedoti. Āmantā. Nanu paṭhamassa jhānassa saddo kaṇṭako vutto bhagavatāti . Āmantā. Hañci paṭhamassa jhānassa saddo kaṇṭako vutto bhagavatā tena vata re vattabbe samāpannassa atthi vacībhedoti.

[620] Paṭhamassa jhānassa saddo kaṇṭako vutto bhagavatāti samāpannassa atthi vacībhedoti . āmantā . dutiyassa jhānassa vitakkavicārā kaṇṭako vuttā bhagavatā .pe. tatiyassa jhānassa pīti kaṇṭako vuttā bhagavatā catutthassa jhānassa assāsapassāsā kaṇṭako vuttā bhagavatā ākāsānañcāyatanaṃ samāpannassa rūpasaññā kaṇṭako vuttā bhagavatā viññāṇañcāyatanaṃ samāpannassa ākāsānañcāyatanasaññā kaṇṭako vuttā bhagavatā ākiñcaññāyatanaṃ samāpannassa viññāṇañcāyatanasaññā kaṇṭako vuttā bhagavatā nevasaññānāsaññāyatanaṃ samāpannassa ākiñcaññāyatanasaññā kaṇṭako vuttā bhagavatā .pe. saññāvedayitanirodhaṃ samāpannassa saññā ca vedanā ca kaṇṭako vuttā bhagavatā atthi tassa saññā ca vedanā cāti. Na hevaṃ vattabbe .pe.

[621] Na vattabbaṃ samāpannassa atthi vacībhedoti. Āmantā. Nanu vuttaṃ bhagavatā sikhissa ānanda bhagavato arahato sammāsambuddhassa abhibhū nāma sāvako brahmaloke ṭhito sahassīlokadhātuṃ sarena viññāpesi ārabbhatha nikkamatha yuñjatha buddhasāsane dhunātha maccuno senaṃ naḷāgāraṃva kuñjaro Yo imasmiṃ dhammavinaye appamatto vihessati pahāya jātisaṃsāraṃ dukkhassantaṃ karissatīti attheva suttantoti . āmantā . tena hi samāpannassa atthi vacībhedoti. Vacībhedakathā. -----