[632] Ekaṃ cittaṃ divasaṃ tiṭṭhatīti . āmantā . yeneva cittena abhikkamati teneva cittena paṭikkamati yeneva cittena paṭikkamati teneva cittena abhikkamati yeneva cittena āloketi teneva cittena viloketi yeneva cittena viloketi teneva cittena Āloketi yeneva cittena sammiñjeti teneva cittena pasāreti yeneva cittena pasāreti teneva cittena sammiñjetīti . na hevaṃ vattabbe .pe.

[633] Ākāsānañcāyatanūpagānaṃ devānaṃ ekaṃ cittaṃ yāvatāyukaṃ tiṭṭhatīti . āmantā . manussānaṃ ekaṃ cittaṃ yāvatāyukaṃ tiṭṭhatīti. Na hevaṃ vattabbe .pe.

[634] Ākāsānañcāyatanūpagānaṃ devānaṃ ekaṃ cittaṃ yāvatāyukaṃ tiṭṭhatīti . āmantā . cātummahārājikānaṃ devānaṃ .pe. Tāvatiṃsānaṃ devānaṃ ... yāmānaṃ devānaṃ ... tusitānaṃ devānaṃ ... Nimmānaratīnaṃ devānaṃ ... paranimmitavasavattīnaṃ devānaṃ ... Brahmapārisajjānaṃ devānaṃ ... brahmapurohitānaṃ devānaṃ ... Mahābrahmānaṃ devānaṃ ... Parittābhānaṃ devānaṃ ... appamāṇābhānaṃ devānaṃ ... ābhassarānaṃ devānaṃ ... Parittasubhānaṃ devānaṃ ... Appamāṇasubhānaṃ devānaṃ ... Subhakiṇhānaṃ devānaṃ ... Vehapphalānaṃ devānaṃ ... Avihānaṃ devānaṃ ... Atappānaṃ devānaṃ ... Sudassānaṃ devānaṃ ... sudassīnaṃ devānaṃ .pe. Akaniṭṭhānaṃ devānaṃ ekaṃ cittaṃ yāvatāyukaṃ tiṭṭhatīti. Na hevaṃ vattabbe .pe.

[635] Ākāsānañcāyatanūpagānaṃ devānaṃ vīsati kappasahassāni āyuppamāṇaṃ ākāsānañcāyatanūpagānaṃ devānaṃ ekaṃ cittaṃ vīsati kappasahassāni tiṭṭhatīti . āmantā . manussānaṃ vassasataṃ āyuppamāṇaṃ manussānaṃ ekaṃ cittaṃ vassasataṃ tiṭṭhatīti. Na hevaṃ vattabbe .pe.