[654] Anāgāmiphalasacchikiriyāya paṭipanno puggalo dukkhadassanena kiṃ jahatīti . aṇusahagataṃ kāmarāgaṃ aṇusahagataṃ byāpādaṃ tadekaṭṭhe ca kilese catubhāgaṃ jahatīti . catubhāgaṃ anāgāmī catubhāgaṃ na anāgāmī catubhāgaṃ anāgāmiphalappatto paṭiladdho adhigato sacchikato upasampajja viharati kāyena phusitvā viharati catubhāgaṃ na kāyena phusitvā viharati catubhāgaṃ antarāparinibbāyī .pe. upahaccaparinibbāyī .pe. asaṅkhāraparinibbāyī .pe. sasaṅkhāraparinibbāyī .pe. uddhaṃsoto akaniṭṭhagāmī catubhāgaṃ na uddhaṃsoto na akaniṭṭhagāmīti . na hevaṃ vattabbe .pe. samudayadassanena .pe. Nirodhadassanena .pe. maggadassanena kiṃ jahatīti . aṇusahagataṃ kāmarāgaṃ aṇusahagataṃ byāpādaṃ tadekaṭṭhe ca kilese catubhāgaṃ jahatīti . catubhāgaṃ anāgāmī catubhāgaṃ na anāgāmī catubhāgaṃ anāgāmiphalappatto paṭiladdho adhigato sacchikato upasampajja viharati Kāyena phusitvā viharati catubhāgaṃ na kāyena phusitvā viharati catubhāgaṃ antarāparinibbāyī .pe. upahaccaparinibbāyī .pe. asaṅkhāraparinibbāyī .pe. sasaṅkhāraparinibbāyī uddhaṃsoto akaniṭṭhagāmī catubhāgaṃ na uddhaṃsoto na akaniṭṭhagāmīti. Na hevaṃ vattabbe .pe.

[655] Arahattasacchikiriyāya paṭipanno puggalo dukkhadassanena kiṃ jahatīti . rūparāgaṃ arūparāgaṃ mānaṃ uddhaccaṃ avijjaṃ tadekaṭṭhe ca kilese catubhāgaṃ jahatīti . catubhāgaṃ arahā catubhāgaṃ na arahā catubhāgaṃ arahattappatto paṭiladdho adhigato sacchikato upasampajja viharati kāyena phusitvā viharati catubhāgaṃ na kāyena phusitvā viharati catubhāgaṃ vītarāgo vītadoso vītamoho katakaraṇīyo ohitabhāro anuppattasadattho parikkhīṇabhavasaññojano sammadaññā vimutto ukkhittapaligho saṅkiṇṇaparikho abbuḷhesiko niraggaḷo ariyo pannaddhajo pannabhāro visaññutto suvijitavijayo dukkhantassa pariññātaṃ samudayo pahīno nirodho sacchikato maggo bhāvito abhiññeyyaṃ abhiññātaṃ pariññeyyaṃ pariññātaṃ pahātabbaṃ pahīnaṃ bhāvetabbaṃ bhāvitaṃ .pe. sacchikātabbaṃ sacchikataṃ catubhāgaṃ sacchikātabbaṃ na sacchikatanti. {655.1} Na hevaṃ vattabbe .pe. samudayadassanena .pe. Nirodhadassanena .pe. maggadassanena kiṃ jahatīti . rūparāgaṃ arūparāgaṃ mānaṃ uddhaccaṃ avijjaṃ tadekaṭṭhe ca kilese catubhāgaṃ jahatīti . catubhāgaṃ arahā catubhāgaṃ na arahā catubhāgaṃ Arahattappatto paṭiladdho adhigato sacchikato upasampajja viharati kāyena phusitvā viharati catubhāgaṃ na kāyena phusitvā viharati catubhāgaṃ vītarāgo vītadoso vītamoho katakaraṇīyo ohitabhāro anuppattasadattho parikkhīṇabhavasaññojano sammadaññā vimutto ukkhittapaligho saṅkiṇṇaparikho abbuḷhesiko niraggaḷo ariyo pannaddhajo pannabhāro visaññutto suvijitavijayo dukkhantassa pariññātaṃ samudayo pahīno nirodho sacchikato maggo bhāvito abhiññeyyaṃ abhiññātaṃ pariññeyyaṃ pariññātaṃ pahātabbaṃ pahīnaṃ bhāvetabbaṃ bhāvitaṃ .pe. sacchikātabbaṃ sacchikataṃ catubhāgaṃ sacchikātabbaṃ na sacchikatanti. Na hevaṃ vattabbe .pe.