[867] Gihissa arahāti . āmantā . atthi arahato gihisaññojananti . na hevaṃ vattabbe .pe. natthi arahato gihisaññojananti . āmantā . hañci natthi arahato gihisaññojanaṃ no vata re vattabbe gihissa arahāti.

[868] Gihissa arahāti . āmantā . Nanu arahato gihisaññojanaṃ pahīnaṃ ucchinnamūlaṃ tālāvatthukataṃ anabhāvaṃkataṃ āyatiṃanuppādadhammanti . Āmantā . hañci arahato gihisaññojanaṃ pahīnaṃ ucchinnamūlaṃ tālāvatthukataṃ anabhāvaṃkataṃ āyatiṃanuppādadhammaṃ no vata re vattabbe gihissa arahāti.

[869] Gihissa arahāti . āmantā . atthi koci gihī Natthi . hañci natthi koci gihī gihisaññojanaṃ appahāya diṭṭheva dhamme dukkhassantakaro no vata re vattabbe gihissa arahāti.

[870] Gihissa arahāti . āmantā . nanu vacchagotto paribbājako bhagavantaṃ etadavoca atthi nu kho bho gotama koci gihī gihisaññojanaṃ appahāya kāyassa bhedā dukkhassantakaroti natthi kho vaccha koci gihī gihisaññojanaṃ appahāya kāyassa bhedā dukkhassantakaroti attheva suttantoti . āmantā . tena hi na vattabbaṃ gihissa arahāti.