[993] Sakadāgāmiphalasacchikiriyāya paṭipanno puggalo sotāpattiphalena samannāgatoti . āmantā . sakadāgāmiphalasacchikiriyāya paṭipanno puggalo sotāpanno sattakkhattuṃparamo kolaṃkolo ekavījīti . Na hevaṃ vattabbe .pe.

[994] Sotāpattiphalena samannāgato sotāpannoti vattabboti. Āmantā . arahattasacchikiriyāya paṭipanno puggalo sotāpattiphalena samannāgatoti . āmantā . sveva arahattasacchikiriyāya paṭipanno so sotāpannoti. Na hevaṃ vattabbe .pe.

[995] Sakadāgāmiphalena samannāgato sakadāgāmīti vattabboti . Āmantā . arahattasacchikiriyāya paṭipanno puggalo sakadāgāmiphalena samannāgatoti . āmantā . sveva arahattasacchikiriyāya paṭipanno so sakadāgāmīti. Na hevaṃ vattabbe .pe.

[996] Anāgāmiphalena samannāgato anāgāmīti vattabboti . Āmantā . arahattasacchikiriyāya paṭipanno puggalo anāgāmiphalena samannāgatoti . āmantā . sveva arahattasacchikiriyāya paṭipanno so anāgāmīti. Na hevaṃ vattabbe .pe.