[997] Sotāpattiphalena samannāgato sotāpannoti vattabboti. Āmantā . anāgāmiphalasacchikiriyāya paṭipanno puggalo sotāpatti phalena samannāgatoti . āmantā . sveva anāgāmiphalasacchikiriyāya paṭipanno so sotāpannoti. Na hevaṃ vattabbe .pe.

[998] Sakadāgāmiphalena samannāgato sakadāgāmīti vattabboti . Āmantā . anāgāmiphalasacchikiriyāya paṭipanno puggalo sakadāgāmiphalena samannāgatoti . āmantā . sveva anāgāmiphalasacchikiriyāya paṭipanno so sakadāgāmīti. Na hevaṃ vattabbe .pe.

[999] Sotāpattiphalena samannāgato sotāpannoti vattabboti. Āmantā . sakadāgāmiphalasacchikiriyāya paṭipanno puggalo sotāpattiphalena samannāgatoti . āmantā . sveva sakadāgāmiphalasacchikiriyāya paṭipanno so sotāpannoti. Na hevaṃ vattabbe .pe.

[1000] Arahattasacchikiriyāya paṭipanno puggalo sotāpattiphalena samannāgatoti . āmantā . nanu arahattasacchikiriyāya paṭipanno puggalo sotāpattiphalaṃ vītivattoti . Āmantā. Hañci arahattasacchikiriyāya paṭipanno puggalo sotāpattiphalaṃ vītivatto no vata re vattabbe arahattasacchikiriyāya paṭipanno puggalo sotāpattiphalena samannāgatoti.