[1022] Arahattamaggena sabbe saññojanā pahīyantīti . Āmantā . arahattamaggena aṇusahagataṃ kāmarāgaṃ aṇusahagataṃ byāpādaṃ pajahatīti. Na hevaṃ vattabbe .pe.

[1023] Arahattamaggena aṇusahagataṃ kāmarāgaṃ aṇusahagataṃ byāpādaṃ pajahatīti . āmantā . nanu kāmarāgabyāpādānaṃ anavasesappahānaṃ anāgāmiphalaṃ vuttaṃ bhagavatāti . āmantā . Hañci kāmarāgabyāpādānaṃ anavasesappahānaṃ anāgāmiphalaṃ vuttaṃ bhagavatā no vata re vattabbe arahattamaggena sabbe saññojanā pahīyantīti.

[1024] Arahattamaggena sabbe saññojanā pahīyantīti . Āmantā . nanu rūparāgaarūparāgamānauddhaccaavijjāya anavasesappahānaṃ Pahānaṃ arahattaṃ vuttaṃ bhagavatāti . āmantā . hañci rūparāga- arūparāgamānauddhaccaavijjāya anavasesappahānaṃ arahattaṃ vuttaṃ bhagavatā no vata re vattabbe arahattamaggena sabbe saññojanā pahīyantīti.

[1025] Na vattabbaṃ sabbasaññojanānaṃ pahānaṃ arahattanti . Āmantā . nanu arahato sabbe saññojanā pahīnāti . āmantā. Hañci arahato sabbe saññojanā pahīnā tena vata re vattabbe sabbasaññojanānaṃ pahānaṃ arahattanti. Sabbasaññojanappahānakathā. Catuttho vaggo. Tassa uddānaṃ gihissa arahā saha upapattiyā arahā arahato sabbe dhammā anāsavā arahā catūhi phalehi samannāgato evameva chahi upekkhāhi bodhiyā buddho sahaṃ lakkhaṇasamannāgato bodhisatto okkantaniyāmo caritabrahmacariyo paṭipannako phalena samannāgato sabbasaññojanānaṃ pahānaṃ arahattanti. ----------