[1039] Paṭhavīkasiṇaṃ samāpattiṃ samāpannassa viparīte ñāṇanti . Āmantā . arahā paṭhavīkasiṇaṃ samāpattiṃ samāpajjeyyāti. Āmantā. Hañci arahā paṭhavīkasiṇaṃ samāpattiṃ samāpajjeyya no vata re vattabbe paṭhavīkasiṇaṃ samāpattiṃ samāpannassa viparīte ñāṇanti.

[1040] Paṭhavīkasiṇaṃ samāpattiṃ samāpannassa viparīte ñāṇaṃ arahā paṭhavīkasiṇaṃ samāpattiṃ samāpajjeyyāti . āmantā . atthi arahato vipariyesoti. Na hevaṃ vattabbe .pe.

[1041] Atthi arahato vipariyesoti . āmantā . atthi arahato saññāvipariyeso cittavipariyeso diṭṭhivipariyesoti . na hevaṃ vattabbe .pe.

[1042] Natthi arahato saññāvipariyeso cittavipariyeso diṭṭhivipariyesoti . āmantā . hañci natthi arahato saññāvipariyeso cittavipariyeso diṭṭhivipariyeso no vata re vattabbe atthi arahato vipariyesoti.