[1073] Paccuppanne ñāṇaṃ atthīti . āmantā . tena ñāṇena taṃ ñāṇaṃ jānātīti . na hevaṃ vattabbe .pe. Tena ñāṇena taṃ ñāṇaṃ jānātīti . āmantā . tena ñāṇena taṃ ñāṇaṃ ñāṇanti jānātīti . na hevaṃ vattabbe .pe. tena ñāṇena taṃ ñāṇaṃ ñāṇanti jānātīti . āmantā . taṃ ñāṇaṃ tassa ñāṇassa ārammaṇanti . na hevaṃ vattabbe .pe. taṃ ñāṇaṃ tassa ñāṇassa ārammaṇanti . āmantā . tena phassena taṃ phassaṃ phusati tāya vedanāya taṃ vedanaṃ vedeti tāya saññāya taṃ saññaṃ sañjānāti tāya cetanāya taṃ cetanaṃ ceteti tena cittena taṃ cittaṃ cinteti tena vitakkena taṃ vitakkaṃ vitakketi tena vicārena taṃ vicāraṃ vicāreti tāya pītiyā taṃ pītiṃ piyāyati tāya satiyā taṃ satiṃ sarati tāya Na hevaṃ vattabbe .pe.

[1074] Na vattabbaṃ paccuppanne ñāṇaṃ atthīti . āmantā. Nanu sabbasaṅkhāre aniccato diṭṭhe tampi ñāṇaṃ aniccato diṭṭhaṃ hotīti . āmantā . hañci sabbasaṅkhāre aniccato diṭṭhe tampi ñāṇaṃ aniccato diṭṭhaṃ hoti tena vata re vattabbe paccuppanne ñāṇaṃ atthīti. Paccuppannañāṇakathā. -------