[1117] Paṭhavīdhātu sanidassanāti . āmantā . rūpaṃ rūpāyatanaṃ rūpadhātu nīlaṃ pītakaṃ lohitakaṃ odātaṃ cakkhuviññeyyaṃ cakkhusmiṃ paṭihaññati Cakkhussa āpāthaṃ āgacchatīti. Na hevaṃ vattabbe .pe.

[1118] Paṭhavīdhātu sanidassanāti . āmantā . cakkhuñca paṭicca paṭhavīdhātuñca uppajjati cakkhuviññāṇanti . na hevaṃ vattabbe .pe.

[1119] Cakkhuñca paṭicca paṭhavīdhātuñca uppajjati cakkhuviññāṇanti . āmantā . cakkhuñca paṭicca paṭhavīdhātuñca uppajjati cakkhuviññāṇanti attheva suttantoti . natthi . cakkhuñca paṭicca rūpe ca uppajjati cakkhuviññāṇanti attheva suttantoti . Āmantā . hañci cakkhuñca paṭicca rūpe ca uppajjati cakkhuviññāṇanti attheva suttanto no vata re vattabbe cakkhuñca paṭicca paṭhavīdhātuñca uppajjati cakkhuviññāṇanti.

[1120] Na vattabbaṃ paṭhavīdhātu sanidassanāti . āmantā . Nanu passasi bhūmiṃ pāsāṇaṃ pabbatanti . āmantā . hañci passasi bhūmiṃ pāsāṇaṃ pabbataṃ tena vata re vattabbe paṭhavīdhātu sanidassanāti .pe. na vattabbaṃ āpodhātu sanidassanāti . Āmantā. Nanu passasi udakanti . āmantā . hañci passasi udakaṃ tena vata re vattabbe āpodhātu sanidassanāti .pe. na vattabbaṃ tejodhātu sanidassanāti . āmantā . nanu passasi aggiṃ jalantanti . āmantā . hañci passasi aggiṃ jalantaṃ tena vata re vattabbe tejodhātu sanidassanāti .pe. na vattabbaṃ Vāyodhātu sanidassanāti . āmantā . nanu passasi vātena rukkhe sañcāliyamāneti . āmantā . hañci passasi vātena rukkhe sañcāliyamāne tena vata re vattabbe vāyodhātu sanidassanāti .pe. Paṭhavīdhātu sanidassanātyādikathā. --------