[1258] Akusalena cittena samuṭṭhitaṃ kāyakammaṃ rūpaṃ akusalanti. Āmantā . sārammaṇaṃ atthi tassa āvajjanā ābhogo samannāhāro manasikāro cetanā patthanā paṇidhīti . na hevaṃ vattabbe .pe. nanu anārammaṇaṃ natthi tassa āvajjanā ābhogo samannāhāro manasikāro cetanā patthanā paṇidhīti . Āmantā . hañci anārammaṇaṃ natthi tassa āvajjanā ābhogo samannāhāro manasikāro cetanā patthanā paṇidhi no vata re vattabbe akusalena cittena samuṭṭhitaṃ kāyakammaṃ rūpaṃ akusalanti.

[1259] Akusalena cittena samuṭṭhito phasso akusalo sārammaṇo atthi tassa āvajjanā .pe. paṇidhīti . āmantā . akusalena cittena samuṭṭhitaṃ kāyakammaṃ rūpaṃ akusalaṃ sārammaṇaṃ atthi tassa āvajjanā .pe. paṇidhīti . na hevaṃ vattabbe .pe. akusalena cittena samuṭṭhitā vedanā .pe. saññā cetanā rāgo doso moho māno diṭṭhi vicikicchā thīnaṃ uddhaccaṃ ahirikaṃ .pe. anottappaṃ akusalaṃ sārammaṇaṃ atthi tassa āvajjanā .pe. paṇidhīti . Āmantā . akusalena cittena samuṭṭhitaṃ kāyakammaṃ rūpaṃ akusalaṃ sārammaṇaṃ atthi tassa āvajjanā .pe. paṇidhīti . na hevaṃ vattabbe .pe.

[1260] Akusalena cittena samuṭṭhitaṃ kāyakammaṃ rūpaṃ akusalaṃ anārammaṇaṃ natthi tassa āvajjanā .pe. paṇidhīti . āmantā . Akusalena cittena samuṭṭhito phasso akusalo anārammaṇo natthi tassa āvajjanā .pe. paṇidhīti . na hevaṃ vattabbe .pe. akusalena cittena samuṭṭhitaṃ kāyakammaṃ rūpaṃ akusalaṃ anārammaṇaṃ natthi tassa āvajjanā .pe. paṇidhīti . āmantā . akusalena cittena samuṭṭhitā vedanā .pe. saññā cetanā rāgo doso moho māno diṭṭhi vicikicchā thīnaṃ uddhaccaṃ ahirikaṃ .pe. anottappaṃ akusalaṃ anārammaṇaṃ natthi tassa āvajjanā .pe. Paṇidhīti. Na hevaṃ vattabbe .pe.

[1261] Akusalena cittena samuṭṭhitaṃ kāyakammaṃ rūpaṃ akusalanti. Āmantā . yaṃ kiñci akusalena cittena samuṭṭhitaṃ rūpaṃ sabbantaṃ akusalanti. Na hevaṃ vattabbe .pe.