[254] Parihāyati arahā arahattāti . āmantā . arahā ācinatīti . na hevaṃ vattabbe .pe. arahā apacinatīti . na hevaṃ vattabbe .pe. arahā pajahatīti . na hevaṃ vattabbe .pe. Arahā upādiyatīti . na hevaṃ vattabbe .pe. arahā visinetīti . Na hevaṃ vattabbe .pe. arahā ussinetīti . na hevaṃ vattabbe .pe. Arahā vidhūpetīti . na hevaṃ vattabbe .pe. arahā sandhūpetīti . na hevaṃ vattabbe .pe. nanu arahā nevācināti na apacināti apacinitvā ṭhitoti . āmantā . hañci arahā nevācināti na apacināti apacinitvā ṭhito no vata re vattabbe parihāyati arahā arahattāti . nanu arahā neva pajahati na upādiyati pajahitvā ṭhitoti . āmantā . hañci arahā neva pajahati na upādiyati pajahitvā ṭhito no vata re vattabbe parihāyati arahā arahattāti . nanu arahā neva visineti na ussineti visinitvā ṭhitoti . āmantā . hañci arahā neva visineti na ussineti visinitvā ṭhito no vata re vattabbe parihāyati arahā arahattāti. Nanu arahā neva vidhūpeti na sandhūpeti vidhūpetvā ṭhitoti. Āmantā. Hañci arahā neva vidhūpeti na sandhūpeti vidhūpetvā ṭhito no vata re vattabbe parihāyati arahā arahattāti. Parihānikathā. -----