[269] Atthi manussesu brahmacariyavāsoti . atthi yattha atthi atthi yattha natthīti . paccantimesu janapadesu atthi yattha atthi atthi yattha natthi brahmacariyavāso milakkhūsu aviññātāresu yattha natthi gati bhikkhūnaṃ bhikkhunīnaṃ upāsakānaṃ upāsikānaṃ majjhimesu janapadesu atthi yattha atthi atthi yattha natthi brahmacariyavāsoti . Na hevaṃ vattabbe.

[270] Manussesu atthi yattha atthi atthi yattha natthi brahmacariya- vāsoti . āmantā . katthatthi kattha natthīti . paccantimesu janapadesu natthi brahmacariyavāso milakkhūsu aviññātāresu yattha natthi gati bhikkhūnaṃ bhikkhunīnaṃ upāsakānaṃ upāsikānaṃ majjhimesu janapadesu atthi brahmacariyavāsoti . paccantimesu janapadesu natthi brahmacariyavāso milakkhūsu aviññātāresu yattha natthi gati bhikkhūnaṃ bhikkhunīnaṃ upāsakānaṃ upāsikānanti . āmantā . majjhimesu janapadesu natthi brahmacariyavāsoti . na hevaṃ vattabbe . majjhimesu Janapadesu atthi brahmacariyavāsoti . āmantā . paccantimesu janapadesu atthi brahmacariyavāso milakkhūsu aviññātāresu yattha natthi gati bhikkhūnaṃ bhikkhunīnaṃ upāsakānaṃ upāsikānanti . na hevaṃ vattabbe .pe.

[271] Atthi devesu brahmacariyavāsoti . āmantā . nanu vuttaṃ bhagavatā tīhi bhikkhave ṭhānehi jambūdīpakā manussā uttarakuruke ca manusse adhiggaṇhanti deve ca tāvatiṃse . katamehi tīhi . Sūrā satimanto idha brahmacariyavāsoti attheva suttantoti . Āmantā. Tena hi natthi devesu brahmacariyavāsoti. {271.1} Sāvatthiyaṃ vuttaṃ bhagavatā idha brahmacariyavāsoti . Āmantā . sāvatthiyaññeva brahmacariyavāso natthaññatra brahmacariyavāsoti. Na hevaṃ vattabbe. {271.2} Anāgāmissa puggalassa pañcorambhāgiyāni saññojanāni pahīnāni pañcuddhambhāgiyāni saññojanāni appahīnāni ito cutassa tattha uppannassa kuhiṃ phaluppattīti . tattheva . hañci anāgāmissa puggalassa pañcorambhāgiyāni saññojanāni pahīnāni pañcuddhambhāgiyāni saññojanāni appahīnāni ito cutassa tattha uppannassa tahiṃ phaluppatti no vata re vattabbe natthi devesu brahmacariyavāsoti . anāgāmissa puggalassa pañcorambhāgiyāni saññojanāni pahīnāni pañcuddhambhāgiyāni saññojanāni