[356] Yassa yattha rūpāyatanaṃ uppajjittha tassa tattha dhammāyatanaṃ uppajjitthāti: āmantā . yassa vā pana yattha dhammāyatanaṃ uppajjittha tassa tattha rūpāyatanaṃ uppajjitthāti: arūpānaṃ tesaṃ tattha dhammāyatanaṃ uppajjittha no ca tesaṃ tattha rūpāyatanaṃ uppajjittha pañcavokārānaṃ asaññasattānaṃ tesaṃ tattha dhammāyatanañca uppajjittha rūpāyatanañca uppajjittha.

[357] Yassa yattha manāyatanaṃ uppajjittha tassa tattha dhammāyatanaṃ uppajjitthāti: āmantā . yassa vā pana yattha dhammāyatanaṃ uppajjittha tassa tattha manāyatanaṃ uppajjitthāti: asaññasattānaṃ tesaṃ tattha dhammāyatanaṃ uppajjittha no ca tesaṃ tattha manāyatanaṃ uppajjittha catuvokārānaṃ pañcavokārānaṃ tesaṃ tattha dhammāyatanañca uppajjittha manāyatanañca uppajjittha.

[358] Yassa cakkhāyatanaṃ nuppajjittha tassa sotāyatanaṃ nuppajjitthāti: natthi . yassa vā pana sotāyatanaṃ nuppajjittha tassa cakkhāyatanaṃ nuppajjitthāti: natthi. (saṅkhittaṃ).

[359] Yassa manāyatanaṃ nuppajjittha tassa dhammāyatanaṃ nuppajjitthāti: Natthi . yassa vā pana dhammāyatanaṃ nuppajjittha tassa manāyatanaṃ nuppajjitthāti: natthi.