[743] Yassa yattha rūpāyatanaṃ nuppajjissati tassa tattha manāyatanaṃ na nirujjhissatīti: pacchimabhavikānaṃ pañcavokāraṃ upapajjantānaṃ arūpānaṃ tesaṃ tattha rūpāyatanaṃ nuppajjissati no ca tesaṃ tattha manāyatanaṃ na nirujjhissati parinibbantānaṃ tesaṃ tattha rūpāyatanañca nuppajjissati manāyatanañca na nirujjhissati . yassa vā pana yattha manāyatanaṃ na nirujjhissati tassa tattha rūpāyatanaṃ nuppajjissatīti: asaññasattānaṃ tesaṃ tattha manāyatanaṃ na nirujjhissati no ca tesaṃ tattha rūpāyatanaṃ nuppajjissati parinibbantānaṃ tesaṃ tattha manāyatanañca na nirujjhissati rūpāyatanañca nuppajjissati.

[744] Yassa yattha rūpāyatanaṃ nuppajjissati tassa tattha dhammāyatanaṃ na nirujjhissatīti: pacchimabhavikānaṃ pañcavokāraṃ upapajjantānaṃ arūpānaṃ tesaṃ tattha rūpāyatanaṃ nuppajjissati no ca tesaṃ tattha dhammāyatanaṃ na nirujjhissati parinibbantānaṃ tesaṃ tattha rūpāyatanañca nuppajjissati dhammāyatanañca na nirujjhissati . yassa vā pana yattha dhammāyatanaṃ .pe. Āmantā.

[745] Yassa yattha manāyatanaṃ nuppajjissati tassa tattha dhammāyatanaṃ Na nirujjhissatīti: pacchimabhavikānaṃ upapajjantānaṃ asaññasattānaṃ tesaṃ tattha manāyatanaṃ nuppajjissati no ca tesaṃ tattha dhammāyatanaṃ na nirujjhissati parinibbantānaṃ tesaṃ tattha manāyatanañca nuppajjissati dhammāyatanañca na nirujjhissati . yassa vā pana yattha dhammāyatanaṃ na nirujjhissati tassa tattha manāyatanaṃ nuppajjissatīti: āmantā. --------

[746] Yassa cakkhāyatanaṃ uppajjati tassa sotāyatanaṃ nirujjhitthāti: āmantā . yassa vā pana sotāyatanaṃ nirujjhittha tassa cakkhāyatanaṃ uppajjatīti: sabbesaṃ cavantānaṃ acakkhukānaṃ upapajjantānaṃ tesaṃ sotāyatanaṃ nirujjhittha no ca tesaṃ cakkhāyatanaṃ uppajjati sacakkhukānaṃ upapajjantānaṃ tesaṃ sotāyatanañca nirujjhittha cakkhāyatanañca uppajjati . yathā uppādavāre paccupannenātītā pucchā vibhattā evaṃ uppādanirodhepi paccuppannenātītā pucchā anulomampi paccaniyampi vibhajitabbaṃ. ---------