[1048] Yattha vacīsaṅkhāro nuppajjati tattha cittasaṅkhāro nuppajjatīti: dutiyajjhāne tatiyajjhāne catutthajjhāne tattha vacīsaṅkhāro nuppajjati no ca tattha cittasaṅkhāro nuppajjati asaññasatte tattha vacīsaṅkhāro ca nuppajjati cittasaṅkhāro ca nuppajjati . yattha vā pana cittasaṅkhāro nuppajjati tattha vacīsaṅkhāro nuppajjatīti: āmantā.

[1049] Yassa yattha kāyasaṅkhāro nuppajjati tassa tattha Vacīsaṅkhāro nuppajjatīti: vinā assāsapassāsehi vitakkavicārānaṃ uppādakkhaṇe tesaṃ tattha kāyasaṅkhāro nuppajjati no ca tesaṃ tattha vacīsaṅkhāro nuppajjati sabbesaṃ cittassa bhaṅgakkhaṇe vinā assāsapassāsehi avitakkaavicāracittassa uppādakkhaṇe asaññasattānaṃ tesaṃ tattha kāyasaṅkhāro ca nuppajjati vacīsaṅkhāro ca nuppajjati . yassa vā pana vacīsaṅkhāro .pe. Yassakampi yassayatthakampi sadisaṃ vitthāretabbaṃ . yassayatthake nirodhasamāpannānanti na labbhati. --------

[1050] Yassa kāyasaṅkhāro uppajjittha tassa vacīsaṅkhāro uppajjitthāti: āmantā . yassa vā pana vacīsaṅkhāro .pe. Āmantā . yassa kāyasaṅkhāro uppajjittha tassa cittasaṅkhāro uppajjitthāti: āmantā . yassa vā pana cittasaṅkhāro .pe. Āmantā . yassa vacīsaṅkhāro uppajjittha tassa cittasaṅkhāro uppajjitthāti: āmantā . yassa vā pana cittasaṅkhāro .pe. Āmantā.

[1051] Yattha kāyasaṅkhāro uppajjittha .pe. yatthakampi sabbattha ekasadisaṃ.