[1362] Yo kāmarāgānusayañca paṭighānusayañca mānānusayañca diṭṭhānusayañca pajahati so vicikicchānusayaṃ pajahatīti: natthi . Yo vā pana vicikicchānusayaṃ pajahati so kāmarāgānusayañca paṭighānusayañca Mānānusayañca diṭṭhānusayañca pajahatīti: diṭṭhānusayaṃ pajahati kāmarāgānusayañca paṭighānusayañca mānānusayañca tadekaṭṭhaṃ pajahati .pe.

[1363] Yo kāmarāgānusayañca paṭighānusayañca mānānusayañca diṭṭhānusayañca vicikicchānusayañca pajahati so bhavarāgānusayaṃ .pe. Avijjānusayaṃ pajahatīti: natthi . yo vā pana avijjānusayaṃ pajahati so kāmarāgānusayañca paṭighānusayañca mānānusayañca diṭṭhānusayañca vicikicchānusayañca pajahatīti: mānānusayaṃ pajahati.

[1364] Yo kāmarāgānusayañca paṭighānusayañca mānānusayañca diṭṭhānusayañca vicikicchānusayañca bhavarāgānusayañca pajahati so avijjānusayaṃ pajahatīti: natthi . yo vā pana avijjānusayaṃ pajahati so kāmarāgānusayañca paṭighānusayañca mānānusayañca diṭṭhānusayañca vicikicchānusayañca bhavarāgānusayañca pajahatīti: mānānusayañca bhavarāgānusayañca pajahati.

[1365] Yato kāmarāgānusayaṃ pajahati tato paṭighānusayaṃ pajahatīti: no . yato vā pana paṭighānusayaṃ pajahati tato kāmarāgānusayaṃ pajahatīti: no . yato kāmarāgānusaya pajahati tato mānānusayaṃ pajahatīti: āmantā . yato vā pana mānānusayaṃ pajahati tato kāmarāgānusayaṃ pajahatīti: rūpadhātuyā arūpadhātuyā tato mānānusayaṃ pajahati no ca tato kāmarāgānusayaṃ pajahati kāmadhātuyā dvīsu vedanāsu tato Mānānusayañca pajahati kāmarāgānusayañca pajahati . yato kāmarāgānusayaṃ pajahati tato diṭṭhānusayaṃ .pe. vicikicchānusayaṃ pajahatīti: āmantā . Yato vā pana vicikicchānusayaṃ pajahati tato kāmarāgānusayaṃ pajahatīti: dukkhāya vedanāya rūpadhātuyā arūpadhātuyā tato vicikicchānusayaṃ pajahati no ca tato kāmarāgānusayaṃ pajahati kāmadhātuyā dvīsu vedanāsu tato vicikicchānusayañca pajahati kāmarāgānusayañca pajahati. {1365.1} Yato kāmarāgānusayaṃ pajahati tato bhavarāgānusayaṃ pajahatīti: no . yato vā pana bhavarāgānusayaṃ pajahati tato kāmarāgānusayaṃ pajahatīti: no . yato kāmarāgānusayaṃ pajahati tato avijjānusayaṃ pajahatīti: āmantā . yato vā pana avijjānusayaṃ pajahati tato kāmarāgānusayaṃ pajahatīti: dukkhāya vedanāya rūpadhātuyā arūpadhātuyā tato avijjānusayaṃ pajahati no ca tato kāmarāgānusayaṃ pajahati kāmadhātuyā dvīsu vedanāsu tato avijjānusayañca pajahati kāmarāgānusayañca pajahati.