[312] Yattha ghānāyatanaṃ uppajjati tattha rūpāyatanaṃ uppajjatīti: āmantā . yattha vā pana rūpāyatanaṃ uppajjati tattha ghānāyatanaṃ uppajjatīti: rūpāvacare tattha rūpāyatanaṃ uppajjati no ca tattha ghānāyatanaṃ uppajjati kāmāvacare tattha rūpāyatanañca uppajjati ghānāyatanañca uppajjati . (yattha ghānāyatanaṃ uppajjati tattha manāyatanañca dhammāyatanañca ekasadisaṃ nāmaṃ natthi uparivāre saṅkhepo hotīti jānitabbaṃ).

[313] Yattha ghānāyatanaṃ uppajjati tattha dhammāyatanaṃ uppajjatīti: āmantā . yattha vā pana dhammāyatanaṃ uppajjati tattha ghānāyatanaṃ uppajjatīti: rūpāvacare arūpāvacare tattha dhammāyatanaṃ uppajjati no ca tattha ghānāyatanaṃ uppajjati kāmāvacare tattha dhammāyatanañca uppajjati ghānāyatanañca uppajjati.

[314] Yattha rūpāyatanaṃ uppajjati tattha manāyatanaṃ uppajjatīti: asaññasatte tattha rūpāyatanaṃ uppajjati no ca tattha manāyatanaṃ uppajjati pañcavokāre tattha rūpāyatanañca uppajjati manāyatanañca uppajjati . yattha vā pana manāyatanaṃ uppajjati tattha rūpāyatanaṃ uppajjatīti: arūpe tattha manāyatanaṃ uppajjati no ca Tattha rūpāyatanaṃ uppajjati pañcavokāre tattha manāyatanañca uppajjati rūpāyatanañca uppajjati.

[315] Yattha rūpāyatanaṃ uppajjati tattha dhammāyatanaṃ uppajjatīti: āmantā . yattha vā pana dhammāyatanaṃ uppajjati tattha rūpāyatanaṃ uppajjatīti: arūpe tattha dhammāyatanaṃ uppajjati no ca tattha rūpāyatanaṃ uppajjati pañcavokāre asaññasatte tattha dhammāyatanañca uppajjati rūpāyatanañca uppajjati.