[328] Yassa rūpāyatanaṃ nuppajjati tassa dhammāyatanaṃ nuppajjatīti: arūpakānaṃ upapajjantānaṃ tesaṃ rūpāyatanaṃ nuppajjati no ca tesaṃ dhammāyatanaṃ nuppajjati sabbesaṃ cavantānaṃ tesaṃ rūpāyatanañca nuppajjati dhammāyatanañca nuppajjati . yassa vā pana dhammāyatanaṃ nuppajjati tassa rūpāyatanaṃ nuppajjatīti: āmantā.

[329] Yassa manāyatanaṃ nuppajjati tassa dhammāyatanaṃ nuppajjatīti: acittakānaṃ upapajjantānaṃ tesaṃ manāyatanaṃ nuppajjati no ca tesaṃ dhammāyatanaṃ nuppajjati sabbesaṃ cavantānaṃ tesaṃ manāyatanañca nuppajjati dhammāyatanañca nuppajjati . yassa vā pana dhammāyatanaṃ nuppajjati tassa manāyatanaṃ nuppajjatīti: āmantā.

[330] Tattha cakkhāyatanaṃ nuppajjati tattha sotāyatanaṃ nuppajjatīti: āmantā . yattha vā pana sotāyatanaṃ nuppajjati tattha cakkhāyatanaṃ nuppajjatīti: āmantā.

[331] Yattha cakkhāyatanaṃ nuppajjati tattha ghānāyatanaṃ nuppajjatīti: āmantā . yattha vā pana ghānāyatanaṃ nuppajjati tattha cakkhāyatanaṃ nuppajjatīti: rūpāvacare tattha ghānāyatanaṃ nuppajjati no ca tattha cakkhāyatanaṃ nuppajjati asaññasatte arūpe tattha ghānāyatanañca nuppajjati cakkhāyatanañca nuppajjati.