[849] Yassa ghānindriyaṃ uppajjissati tassa upekkhindriyaṃ uppajjissatīti: ye saghānakā somanassena upapajjitvā parinibbāyissanti tesaṃ ghānindriyaṃ uppajjissati no ca tesaṃ upekkhindriyaṃ uppajjissati itaresaṃ ghānindriyañca uppajjissati upekkhindriyañca uppajjissati . yassa vā pana upekkhindriyaṃ uppajjissati tassa ghānindriyaṃ uppajjissatīti: ye rūpāvacaraṃ arūpāvacaraṃ upapajjitvā parinibbāyissanti tesaṃ upekkhindriyaṃ uppajjissati no ca tesaṃ ghānindriyaṃ uppajjissati itaresaṃ upekkhindriyañca uppajjissati ghānindriyañca uppajjissati.

[850] Yassa ghānindriyaṃ uppajjissati tassa saddhindriyaṃ .pe. Paññindriyaṃ manindriyaṃ uppajjissatīti: āmantā . yassa vā pana manindriyaṃ uppajjissati tassa ghānindriyaṃ uppajjissatīti: ye rūpāvacaraṃ arūpāvacaraṃ upapajjitvā parinibbāyissanti tesaṃ manindriyaṃ uppajjissati no ca tesaṃ ghānindriyaṃ uppajjissati itaresaṃ manindriyañca uppajjissati ghānindriyañca uppajjissati.

[851] Yassa itthindriyaṃ uppajjissati tassa purisindriyaṃ uppajjissatīti: yā itthiyo eteneva bhāvena katici bhave dassetvā parinibbāyissanti tāsaṃ itthindriyaṃ uppajjissati no ca tāsaṃ purisindriyaṃ uppajjissati itaresaṃ itthindriyañca uppajjissati purisindriyañca uppajjissati . yassa vā pana purisindriyaṃ uppajjissati tassa itthindriyaṃ uppajjissatīti: ye purisā eteneva bhāvena katici bhave dassetvā parinibbāyissanti tesaṃ purisindriyaṃ uppajjissati no ca tesaṃ itthindriyaṃ uppajjissati itaresaṃ purisindriyañca uppajjissati itthindriyañca uppajjissati.

[852] Yassa itthindriyaṃ uppajjissati tassa jīvitindriyaṃ uppajjissatīti: āmantā . yassa vā pana jīvitindriyaṃ uppajjissati tassa itthindriyaṃ uppajjissatīti: ye rūpāvacaraṃ arūpāvacaraṃ upapajjitvā parinibbāyissanti ye ca purisā eteneva bhāvena katici bhave dassetvā parinibbāyissanti tesaṃ jīvitindriyaṃ uppajjissati No ca tesaṃ itthindriyaṃ uppajjissati itaresaṃ jīvitindriyañca uppajjissati itthindriyañca uppajjissati.