[853] Yassa itthindriyaṃ uppajjissati tassa somanassindriyaṃ uppajjissatīti: yā itthiyo eteneva bhāvena katici bhave dassetvā upekkhāya upapajjitvā parinibbāyissanti tāsaṃ itthindriyaṃ uppajjissati no ca tāsaṃ somanassindriyaṃ uppajjissati itaresaṃ itthindriyañca uppajjissati somanassindriyañca uppajjissati . Yassa vā pana somanassindriyaṃ uppajjissati tassa itthindriyaṃ uppajjissatīti: ye rūpāvacaraṃ upapajjitvā parinibbāyissanti ye ca purisā eteneva bhāvena katici bhave dassetvā somanassena upapajjitvā parinibbāyissanti tesaṃ somanassindriyaṃ uppajjissati no ca tesaṃ itthindriyaṃ uppajjissati itaresaṃ somanassindriyañca uppajjissati itthindriyañca uppajjissati.

[854] Yassa itthindriyaṃ uppajjissati tassa upekkhindriyaṃ uppajjissatīti: yā itthiyo eteneva bhāvena katici bhave dassetvā somanassena upapajjitvā parinibbāyissanti tāsaṃ itthindriyaṃ uppajjissati no ca tāsaṃ upekkhindriyaṃ uppajjissati itaresaṃ itthindriyañca uppajjissati upekkhindriyañca uppajjissati . yassa vā pana upekkhindriyaṃ uppajjissati tassa itthindriyaṃ uppajjissatīti: ye rūpāvacaraṃ arūpāvacaraṃ upapajjitvā parinibbāyissanti ye ca Purisā eteneva bhāvena katici bhave dassetvā upekkhāya upapajjitvā parinibbāyissanti tesaṃ upekkhindriyaṃ uppajjissati no ca tesaṃ itthindriyaṃ uppajjissati itaresaṃ upekkhindriyañca uppajjissati itthindriyañca uppajjissati.

[855] Yassa itthindriyaṃ uppajjissati tassa saddhindriyaṃ .pe. Paññindriyaṃ manindriyaṃ uppajjissatīti: āmantā . yassa vā pana manindriyaṃ uppajjissati tassa itthindriyaṃ uppajjissatīti: ye rūpāvacaraṃ arūpāvacaraṃ upapajjitvā parinibbāyissanti ye ca purisā eteneva bhāvena katici bhave dassetvā parinibbāyissanti tesaṃ manindriyaṃ uppajjissati no ca tesaṃ itthindriyaṃ uppajjissati itaresaṃ manindriyañca uppajjissati itthindriyañca uppajjissati.

[856] Yassa purisindriyaṃ uppajjissati tassa jīvitindriyaṃ uppajjissatīti: āmantā . yassa vā pana jīvitindriyaṃ uppajjissati tassa purisindriyaṃ uppajjissatīti: ye rūpāvacaraṃ arūpāvacaraṃ upapajjitvā parinibbāyissanti yā ca itthiyo eteneva bhāvena katici bhave dassetvā parinibbāyissanti tesaṃ jīvitindriyaṃ uppajjissati no ca tesaṃ purisindriyaṃ uppajjissati itaresaṃ jīvitindriyañca uppajjissati purisindriyañca uppajjissati.

เล่มที่ ๓๙ ยมก ภาค ๒๒๓๒

ที่มาและฉบับอื่นของ “[๘๓๗] จักขุนทรีย์จักเกิดขึ้นแก่สัตว์ใด โสตินทรีย์จักเกิดขึ้นแก่สัตว์นั้นหรือ เป็นต้น”