[1221] Yassa yattha saddhindriyaṃ na uppajjati tassa tattha manindriyaṃ na uppajjissatīti: sabbesaṃ cittassa bhaṅgakkhaṇe saddhāvippayuttacittassa uppādakkhaṇe tesaṃ tattha saddhindriyaṃ na uppajjati no ca tesaṃ tattha manindriyaṃ na uppajjissati pacchimacittassa bhaṅgakkhaṇe asaññasattānaṃ tesaṃ tattha saddhindriyañca na uppajjati manindriyañca na uppajjissati . yassa vā pana yattha manindriyaṃ na uppajjissati tassa tattha saddhindriyaṃ na uppajjatīti: pacchimacittassa uppādakkhaṇe tesaṃ tattha manindriyaṃ na uppajjissati no ca tesaṃ tattha saddhindriyaṃ na uppajjati pacchimacittassa bhaṅgakkhaṇe asaññasattānaṃ tesaṃ tattha manindriyañca na uppajjissati saddhindriyañca na uppajjati.

[1222] Yassa yattha paññindriyaṃ na uppajjati tassa tattha manindriyaṃ na uppajjissatīti: sabbesaṃ cittassa bhaṅgakkhaṇe ñāṇavippayuttacittassa uppādakkhaṇe tesaṃ tattha paññindriyaṃ na uppajjati no ca tesaṃ tattha manindriyaṃ na uppajjissati pacchimacittassa bhaṅgakkhaṇe asaññasattānaṃ tesaṃ tattha paññindriyañca na uppajjati manindriyañca na uppajjissati . yassa vā pana yattha manindriyaṃ na uppajjissati tassa tattha paññindriyaṃ na uppajjatīti: pacchimacittassa uppādakkhaṇe tesaṃ tattha manindriyaṃ na uppajjissati no ca tesaṃ tattha paññindriyaṃ na uppajjati pacchimacittassa Bhaṅgakkhaṇe asaññasattānaṃ tesaṃ tattha manindriyañca na uppajjissati paññindriyañca na uppajjati. ------------

[1223] Yassa cakkhundriyaṃ uppajjittha tassa sotindriyaṃ uppajjissatīti: pacchimabhavikānaṃ ye ca arūpaṃ upapajjitvā parinibbāyissanti tesaṃ cakkhundriyaṃ uppajjittha no ca tesaṃ sotindriyaṃ uppajjissati itaresaṃ cakkhundriyañca uppajjittha sotindriyañca uppajjissati . yassa vā pana sotindriyaṃ uppajjissati tassa cakkhundriyaṃ uppajjitthāti: āmantā.

[1224] Yassa cakkhundriyaṃ uppajjittha tassa ghānindriyaṃ uppajjissatīti: pacchimabhavikānaṃ ye ca rūpāvacaraṃ arūpāvacaraṃ upapajjitvā parinibbāyissanti tesaṃ cakkhundriyaṃ uppajjittha no ca tesaṃ ghānindriyaṃ uppajjissati itaresaṃ cakkhundriyañca uppajjittha ghānindriyañca uppajjissati . yassa vā pana ghānindriyaṃ uppajjissati tassa cakkhundriyaṃ uppajjitthāti: āmantā.