[1453] Yo anaññātaññassāmītindriyaṃ na bhāvittha so aññātāvindriyaṃ na sacchikarissatīti: dve puggalā anaññātaññassāmītindriyaṃ na bhāvittha no ca aññātāvindriyaṃ na sacchikarissanti ye puthujjanā maggaṃ na paṭilabhissanti te anaññātaññassāmītindriyañca na bhāvittha aññātāvindriyañca na sacchikarissanti . yo vā pana aññātāvindriyaṃ na sacchikarissati so anaññātaññassāmītindriyaṃ na bhāvitthāti: arahā aññātāvindriyaṃ na sacchikarissati no ca anaññātaññassāmītindriyaṃ na bhāvittha ye puthujjanā maggaṃ na paṭilabhissanti te aññātāvindriyañca na sacchikarissanti anaññātaññassāmītindriyañca na bhāvittha.

[1454] Yo aññindriyaṃ na bhāvittha so aññātāvindriyaṃ na sacchikarissatīti: aṭṭha puggalā aññindriyaṃ na bhāvittha no ca aññātāvindriyaṃ na sacchikarissanti ye puthujjanā maggaṃ na paṭilabhissanti Te aññindriyañca na bhāvittha aññātāvindriyañca na sacchikarissanti . yo vā pana aññātāvindriyaṃ na sacchikarissati so aññindriyaṃ na bhāvitthāti: arahā aññātāvindriyaṃ na sacchikarissati no ca aññindriyaṃ na bhāvittha ye puthujjanā maggaṃ na paṭilabhissanti te aññātāvindriyañca na sacchikarissanti aññindriyañca na bhāvitthāti. Indriyayamakaṃ dasamaṃ niṭṭhitaṃ. Yamakappakaraṇaṃ pacchimaṃ niṭṭhitaṃ.