[313] Yattha kusalā dhammā na uppajjittha tattha abyākatā dhammā na nirujjhitthāti: nirujjhittha . yattha vā pana abyākatā dhammā na nirujjhittha tattha kusalā dhammā na uppajjitthāti: natthi.

[314] Yattha akusalā dhammā na uppajjittha tattha abyākatā dhammā na nirujjhitthāti: nirujjhittha . yattha vā pana abyākatā dhammā na nirujjhittha tattha akusalā dhammā na uppajjitthāti: natthi.

[315] Yassa yattha kusalā dhammā na uppajjittha tassa tattha akusalā dhammā na nirujjhitthāti: suddhāvāsānaṃ dutiye akusale citte vattamāne tesaṃ tattha kusalā dhammā na uppajjittha no ca tesaṃ tattha akusalā dhammā na nirujjhittha suddhāvāsaṃ upapajjantānaṃ asaññasattānaṃ tesaṃ tattha kusalā ca dhammā na uppajjittha akusalā ca dhammā na nirujjhittha . yassa vā pana yattha akusalā dhammā na nirujjhittha tassa tattha kusalā dhammā na uppajjitthāti: āmantā.

[316] Yassa yattha kusalā dhammā na uppajjittha tassa tattha abyākatā dhammā na nirujjhitthāti: suddhāvāsānaṃ dutiye citte vattamāne asaññasattānaṃ tesaṃ tattha kusalā dhammā na uppajjittha No ca tesaṃ tattha abyākatā dhammā na nirujjhittha suddhāvāsaṃ upapajjantānaṃ tesaṃ tattha kusalā ca dhammā na uppajjittha abyākatā ca dhammā na nirujjhittha . yassa vā pana yattha abyākatā dhammā na nirujjhittha tassa tattha kusalā dhammā na uppajjitthāti: āmantā.