[25] Tena kho pana samayena bārāṇasiyaṃ yaso nāma kulaputto seṭṭhiputto sukhumālo hoti . tassa tayo pāsādā honti Eko hemantiko eko gimhiko eko vassiko . so vassike pāsāde cattāro māse nippurisehi turiyehi paricārayamāno na heṭṭhāpāsādaṃ orohati . athakho yasassa kulaputtassa pañcahi kāmaguṇehi samappitassa samaṅgibhūtassa paricārayamānassa paṭikacceva niddā okkami parijanassapi pacchā niddā okkami . sabbarattiyo ca telappadīpo jhāyati. {25.1} Athakho yaso kulaputto paṭikacceva pabujjhitvā addasa sakaṃ parijanaṃ supantaṃ aññissā kacche vīṇaṃ aññissā kaṇṭhe mudiṅgaṃ aññissā ure ālambaraṃ aññaṃ vikesikaṃ aññaṃ vikheḷikaṃ aññā vippalapantiyo hatthappattaṃ susānaṃ maññe . disvānassa ādīnavo pāturahosi nibbidāya cittaṃ saṇṭhāsi . athakho yaso kulaputto udānaṃ udānesi upaddūtaṃ vata bho upassaṭṭhaṃ vata bhoti. {25.2} Athakho yaso kulaputto suvaṇṇapādukāyo ārohitvā yena nivesanadvāraṃ tenupasaṅkami . amanussā dvāraṃ vivariṃsu mā yasassa kulaputtassa koci antarāyamakāsi agārasmā anagāriyaṃ Pabbajjāyāti . athakho yaso kulaputto yena nagaradvāraṃ tenupasaṅkami . amanussā dvāraṃ vivariṃsu mā yasassa kulaputtassa koci antarāyamakāsi agārasmā anagāriyaṃ pabbajjāyāti . Athakho yaso kulaputto yena isipatanaṃ migadāyo tenupasaṅkami.

[26] Tena kho pana samayena bhagavā rattiyā paccūsasamayaṃ paccuṭṭhāya ajjhokāse caṅkamati . addasā kho bhagavā yasaṃ kulaputtaṃ dūrato va āgacchantaṃ disvāna caṅkamā orohitvā paññatte āsane nisīdi . athakho yaso kulaputto bhagavato avidūre udānaṃ udānesi upaddūtaṃ vata bho upassaṭṭhaṃ vata bhoti . athakho bhagavā yasaṃ kulaputtaṃ etadavoca idaṃ kho yasa anupaddūtaṃ idaṃ anupassaṭṭhaṃ ehi yasa nisīda dhammaṃ te desessāmīti. {26.1} Athakho yaso kulaputto idaṃ kira anupaddūtaṃ idaṃ anupassaṭṭhanti haṭṭho udaggo suvaṇṇapādukāhi orohitvā yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinnassa kho yasassa kulaputtassa bhagavā anupubbikathaṃ kathesi seyyathīdaṃ dānakathaṃ sīlakathaṃ saggakathaṃ kāmānaṃ ādīnavaṃ okāraṃ saṅkilesaṃ nekkhamme ānisaṃsaṃ pakāsesi . Yadā bhagavā aññāsi yasaṃ kulaputtaṃ kallacittaṃ muducittaṃ vinīvaraṇacittaṃ udaggacittaṃ pasannacittaṃ atha yā buddhānaṃ sāmukkaṃsikā dhammadesanā taṃ pakāsesi dukkhaṃ samudayaṃ nirodhaṃ maggaṃ . Seyyathāpi nāma suddhaṃ vatthaṃ apagatakāḷakaṃ sammadeva rajanaṃ paṭiggaṇheyya evameva yasassa kulaputtassa tasmiṃyevāsane virajaṃ vītamalaṃ dhammacakkhuṃ udapādi yaṅkiñci samudayadhammaṃ sabbantaṃ nirodhadhammanti.