[166] Athakho bhikkhūnaṃ etadahosi kati nu kho uposathoti . Bhagavato etamatthaṃ ārocesuṃ . dveme bhikkhave uposathā cātuddasiko ca paṇṇarasiko ca ime kho bhikkhave dve uposathāti. {166.1} Athakho bhikkhūnaṃ etadahosi kati nu kho uposathakammānīti. Bhagavato etamatthaṃ ārocesuṃ . cattārīmāni bhikkhave uposathakammāni adhammena vaggaṃ uposathakammaṃ adhammena samaggaṃ uposathakammaṃ dhammena vaggaṃ uposathakammaṃ dhammena samaggaṃ uposathakammaṃ . {166.2} Tatra bhikkhave yadidaṃ adhammena vaggaṃ uposathakammaṃ na bhikkhave evarūpaṃ uposathakammaṃ kātabbaṃ na ca mayā evarūpaṃ uposathakammaṃ anuññātaṃ . tatra bhikkhave yadidaṃ adhammena samaggaṃ uposathakammaṃ na bhikkhave evarūpaṃ uposathakammaṃ kātabbaṃ na ca mayā evarūpaṃ uposathakammaṃ anuññātaṃ. {166.3} Tatra bhikkhave yadidaṃ dhammena vaggaṃ uposathakammaṃ na bhikkhave evarūpaṃ uposathakammaṃ kātabbaṃ na ca mayā evarūpaṃ uposathakammaṃ anuññātaṃ . tatra bhikkhave yadidaṃ dhammena samaggaṃ uposathakammaṃ evarūpaṃ bhikkhave uposathakammaṃ kātabbaṃ evarūpaṃ mayā uposathakammaṃ anuññātaṃ . tasmātiha bhikkhave evarūpaṃ uposathakammaṃ karissāma yadidaṃ dhammena samagganti evañhi vo bhikkhave sikkhitabbanti.