[37] Athakho bhagavā anupubbena cārikaṃ caramāno yena uruvelā tadavasari . tena kho pana samayena uruvelāyaṃ tayo jaṭilā paṭivasanti uruvelakassapo nadīkassapo gayākassapoti . Tesu uruvelakassapo jaṭilo pañcannaṃ jaṭilasatānaṃ nāyako hoti vināyako aggo pamukho pāmokkho . nadīkassapo jaṭilo tiṇṇaṃ jaṭilasatānaṃ nāyako hoti vināyako aggo pamukho pāmokkho. {37.1} Gayākassapo jaṭilo dvinnaṃ jaṭilasatānaṃ nāyako hoti vināyako aggo pamukho pāmokkho . athakho bhagavā yena uruvelakassapassa jaṭilassa assamo tenupasaṅkami upasaṅkamitvā uruvelakassapaṃ jaṭilaṃ etadavoca sace te kassapa agaru vaseyyāma ekarattiṃ agyāgāreti . na kho me mahāsamaṇa garu apica kho caṇḍettha nāgarājā iddhimā āsīviso ghoraviso so taṃ mā viheṭhesīti . dutiyampi kho bhagavā uruvelakassapaṃ jaṭilaṃ etadavoca sace te kassapa agaru vaseyyāma ekarattiṃ agyāgāreti . na kho me mahāsamaṇa garu apica kho caṇḍettha nāgarājā iddhimā Āsīviso ghoraviso so taṃ mā viheṭhesīti . tatiyampi kho bhagavā uruvelakassapaṃ jaṭilaṃ etadavoca sace te kassapa agaru vaseyyāma ekarattiṃ agyāgāreti . na kho me mahāsamaṇa garu apica kho caṇḍettha nāgarājā iddhimā āsīviso ghoraviso so taṃ mā viheṭhesīti . appeva maṃ na viheṭheyya iṅgha tvaṃ kassapa anujānāhi agyāgāranti . vihara mahāsamaṇa yathāsukhanti . Athakho bhagavā agyāgāraṃ pavisitvā tiṇasantharakaṃ paññāpetvā nisīdi pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā.

[38] Athakho so nāgo addasa bhagavantaṃ paviṭṭhaṃ disvāna dukkhī dummano padhūpāsi . athakho bhagavato etadahosi yannūnāhaṃ imassa nāgassa anupahacca chaviñca cammañca maṃsañca nhāruñca aṭṭhiñca aṭṭhimiñjañca tejasā tejaṃ pariyādeyyanti . athakho bhagavā tathārūpaṃ iddhābhisaṅkhāraṃ abhisaṅkharitvā padhūpāsi . athakho so nāgo makkhaṃ asahanto pajjali . bhagavāpi tejodhātuṃ samāpajjitvā pajjali . ubhinnaṃ sañjotibhūtānaṃ agyāgāraṃ ādittaṃ viya hoti sampajjalitaṃ sañjotibhūtaṃ . athakho te jaṭilā agyāgāraṃ parivāretvā evamāhaṃsu abhirūpo vata bho mahāsamaṇo nāgena viheṭhiyatīti . athakho bhagavā tassā rattiyā accayena tassa Nāgassa anupahacca chaviñca cammañca maṃsañca nhāruñca aṭṭhiñca aṭṭhimiñjañca tejasā tejaṃ pariyādayitvā patte pakkhipitvā uruvelakassapassa jaṭilassa dassesi ayante kassapa nāgo pariyādinno assa tejasā tejoti . athakho uruvelakassapassa jaṭilassa etadahosi mahiddhiko kho mahāsamaṇo mahānubhāvo yatra hi nāma caṇḍassa nāgarājassa iddhimato āsīvisassa ghoravisassa tejasā tejaṃ pariyādayissati na tveva ca kho arahā yathā ahanti.