[72] Athakho sārīputtamoggallānā yena bhagavā tenupasaṅkamiṃsu upasaṅkamitvā bhagavato pādesu sirasā nipatitvā bhagavantaṃ etadavocuṃ labheyyāma mayaṃ bhante bhagavato santike pabbajjaṃ labheyyāma upasampadanti . etha bhikkhavoti bhagavā avoca svākkhāto dhammo caratha brahmacariyaṃ sammā dukkhassa antakiriyāyāti . Sā va tesaṃ āyasmantānaṃ upasampadā ahosi.

[73] Tena kho pana samayena abhiññātā abhiññātā māgadhikā kulaputtā bhagavati brahmacariyaṃ caranti . manussā ujjhāyanti khīyanti vipācenti aputtakatāya paṭipanno samaṇo gotamo vedhabyāya paṭipanno samaṇo gotamo kulupacchedāya paṭipanno samaṇo gotamo idāni tena jaṭilasahassaṃ pabbājitaṃ imāni ca aḍḍhateyyāni paribbājakasatāni sañjayāni pabbājitāni ime ca abhiññātā abhiññātā māgadhikā kulaputtā samaṇe gotame brahmacariyaṃ carantīti . apissu bhikkhū disvā imāya gāthāya codenti Āgato kho mahāsamaṇo māgadhānaṃ giribbajaṃ sabbe sañjaye netvāna kaṃsudāni nayissatīti.

[74] Assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ . athakho te bhikkhū bhagavato etamatthaṃ ārocesuṃ . Na bhikkhave so saddo ciraṃ bhavissati sattāhameva bhavissati sattāhassa accayena antaradhāyissati tenahi bhikkhave ye tumhe imāya gāthāya codenti āgato kho mahāsamaṇo māgadhānaṃ giribbajaṃ sabbe sañjaye netvāna kaṃsudāni nayissatīti.

[75] Te tumhe imāya gāthāya paṭicodetha nayanti ve mahāvīrā saddhammena tathāgatā dhammena nīyamānānaṃ kā usuyyā vijānatanti. Tena kho pana samayena manussā bhikkhū disvā imāya gāthāya codenti āgato kho mahāsamaṇo māgadhānaṃ giribbajaṃ sabbe sañjaye netvāna kaṃsudāni nayissatīti. Bhikkhū te manusse imāya gāthāya paṭicodenti nayanti ve mahāvīrā saddhammena tathāgatā dhammena nīyamānānaṃ kā usuyyā vijānatanti.