[112] Tena kho pana samayena aññataraṃ kulaṃ ahivātakarogena kālakataṃ hoti . tassa pitāputtakā sesā honti . te bhikkhūsu Pabbajitvā ekato va piṇḍāya caranti . athakho so dārako pituno bhikkhāya dinnāya upadhāvitvā etadavoca mayhampi tāta dehi mayhampi tāta dehīti . manussā ujjhāyanti khīyanti vipācenti abrahmacārino ime samaṇā sakyaputtiyā ayaṃ dārako bhikkhuniyā jātoti . assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ . athakho te bhikkhū bhagavato etamatthaṃ ārocesuṃ . na bhikkhave ūnapaṇṇarasavasso dārako pabbājetabbo yo pabbājeyya āpatti dukkaṭassāti.

[113] Tena kho pana samayena āyasmato ānandassa upaṭṭhākakulaṃ saddhaṃ pasannaṃ ahivātakarogena kālakataṃ hoti . dve ca dārakā sesā honti . te porāṇakena āciṇṇakappena bhikkhū passitvā upadhāvanti . bhikkhū apasādenti . te bhikkhūhi apasādiyamānā rodanti . athakho āyasmato ānandassa etadahosi bhagavatā paññattaṃ na ūnapaṇṇarasavasso dārako pabbājetabboti ime ca dārakā ūnapaṇṇarasavassā kena nu kho upāyena ime dārakā na vinasseyyunti . athakho āyasmā ānando bhagavato etamatthaṃ ārocesi . ussahanti pana te ānanda dārakā kāke uḍḍepetunti . ussahanti bhagavāti . athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave ūnapaṇṇarasavassaṃ dārakaṃ kākuḍḍepakaṃ pabbājetunti.

[114] Tena kho pana samayena āyasmato upanandassa sakyaputtassa dve sāmaṇerā honti kaṇṭako ca mahako ca . te aññamaññaṃ dūsesuṃ . bhikkhū ujjhāyanti khīyanti vipācenti kathaṃ hi nāma sāmaṇerā evarūpaṃ anācāraṃ ācarissantīti . bhagavato etamatthaṃ ārocesuṃ . na bhikkhave ekena dve sāmaṇerā upaṭṭhāpetabbā yo upaṭṭhāpeyya āpatti dukkaṭassāti.