[150] Pātimokkhanti ādimetaṃ mukhametaṃ pamukhametaṃ kusalānaṃ dhammānaṃ tena vuccati pātimokkhanti . āyasmantoti piyavacanametaṃ garuvacanametaṃ sagāravasappatissādhivacanametaṃ āyasmantoti . uddisissāmīti ācikkhissāmi desessāmi paññāpessāmi paṭṭhapessāmi vivarissāmi Vibhajissāmi uttānīkarissāmi pakāsessāmi . tanti pātimokkhaṃ vuccati . sabbe va santāti yāvatikā tassā parisāya therā ca navā ca majjhimā ca ete vuccanti sabbe va santāti . Sādhukaṃ suṇomāti aṭṭhikatvā manasikatvā sabbaṃ cetasā samannāharāma . manasikaromāti ekaggacittā avikkhittacittā avisāhaṭacittā nisāmema . yassa siyā āpattīti therassa vā navassa vā majjhimassa vā pañcannaṃ vā āpattikkhandhānaṃ aññatarā āpatti sattannaṃ vā āpattikkhandhānaṃ aññatarā āpatti . so āvikareyyāti so deseyya so vivareyya so uttānīkareyya so pakāseyya saṅghamajjhe vā gaṇamajjhe vā ekapuggale vā. {150.1} Asantī nāma āpatti anajjhāpanno vā hoti āpajjitvā vā vuṭṭhito . tuṇhībhavitabbanti adhivāsetabbaṃ na byāharitabbaṃ . parisuddhāti vedissāmīti jānissāmi dhāressāmi. Yathā kho pana paccekapuṭṭhassa veyyākaraṇaṃ hotīti yathā ekena eko puṭṭho byākareyya evamevaṃ tassā parisāya jānitabbaṃ maṃ pucchatīti. Evarūpā nāma Parisā bhikkhuparisā vuccati . yāvatatiyaṃ anussāvitaṃ hotīti sakiṃpi anussāvitaṃ hoti dutiyampi anussāvitaṃ hoti tatiyampi anussāvitaṃ hoti . saramānoti jānamāno sañjānamāno . santī nāma āpatti ajjhāpanno vā hoti āpajjitvā vā avuṭṭhito . {150.2} Nāvikareyyāti na deseyya na vivareyya na uttānīkareyya na pakāseyya saṅghamajjhe vā gaṇamajjhe vā ekapuggale vā . Sampajānamusāvādassa hotīti sampajānamusāvādo kiṃ hoti . Dukkaṭaṃ hoti . antarāyiko dhammo vutto bhagavatāti kissa antarāyiko. Paṭhamassa jhānassa adhigamāya antarāyiko dutiyassa jhānassa adhigamāya antarāyiko tatiyassa jhānassa adhigamāya antarāyiko catutthassa jhānassa adhigamāya antarāyiko jhānānaṃ vimokkhānaṃ samādhīnaṃ samāpattīnaṃ nekkhammānaṃ nissaraṇānaṃ pavivekānaṃ kusalānaṃ dhammānaṃ adhigamāya antarāyiko . tasmāti taṃkāraṇā . Saramānenāti jānamānena sañjānamānena . visuddhāpekkhenāti vuṭṭhātukāmena visujjhitukāmena . santī nāma āpatti ajjhāpanno vā hoti āpajjitvā vā avuṭṭhito . āvikātabbāti āvikātabbā saṅghamajjhe vā gaṇamajjhe vā ekapuggale vā . āvikatā hissa phāsu hotīti kissa phāsu hoti . paṭhamassa jhānassa adhigamāya phāsu hoti dutiyassa jhānassa adhigamāya phāsu hoti tatiyassa Jhānassa adhigamāya phāsu hoti catutthassa jhānassa adhigamāya phāsu hoti jhānānaṃ vimokkhānaṃ samādhīnaṃ samāpattīnaṃ nekkhammānaṃ nissaraṇānaṃ pavivekānaṃ kusalānaṃ dhammānaṃ adhigamāya phāsu hotīti.