[1668] Saṅkiliṭṭhasaṅkilesiko dhammo saṅkiliṭṭhasaṅkilesikassa dhammassa hetupaccayena paccayo saṅkiliṭṭhasaṅkilesikā hetū sampayuttakānaṃ khandhānaṃ hetupaccayena paccayo.

[1669] Saṅkiliṭṭhasaṅkilesiko dhammo asaṅkiliṭṭhasaṅkilesikassa dhammassa hetupaccayena paccayo saṅkiliṭṭhasaṅkilesikā hetū cittasamuṭṭhānānaṃ rūpānaṃ hetupaccayena paccayo.

[1670] Saṅkiliṭṭhasaṅkilesiko dhammo saṅkiliṭṭhasaṅkilesikassa ca asaṅkiliṭṭhasaṅkilesikassa ca dhammassa hetupaccayena paccayo saṅkiliṭṭhasaṅkilesikā hetū sampayuttakānaṃ khandhānaṃ cittasamuṭṭhānānañca rūpānaṃ hetupaccayena paccayo.

[1671] Asaṅkiliṭṭhasaṅkilesiko dhammo asaṅkiliṭṭhasaṅkilesikassa dhammassa hetupaccayena paccayo asaṅkiliṭṭhasaṅkilesikā hetū sampayuttakānaṃ khandhānaṃ cittasamuṭṭhānānañca rūpānaṃ hetupaccayena paccayo paṭisandhikkhaṇe asaṅkiliṭṭhasaṅkilesikā hetū sampayuttakānaṃ khandhānaṃ kaṭattā ca rūpānaṃ hetupaccayena paccayo.