[1171] Sukhāya vedanāya sampayutto dhammo adukkhamasukhāya vedanāya sampayuttassa dhammassa upanissayapaccayena paccayo ārammaṇūpanissayo anantarūpanissayo pakatūpanissayo . pakatūpanissayo: sukhāya vedanāya sampayuttaṃ saddhaṃ upanissāya adukkhamasukhāya vedanāya sampayuttena cittena dānaṃ deti sīlaṃ samādiyati uposathakammaṃ karoti adukkhamasukhāya vedanāya sampayuttaṃ jhānaṃ uppādeti vipassanaṃ uppādeti maggaṃ uppādeti abhiññaṃ uppādeti samāpattiṃ uppādeti mānaṃ jappeti diṭṭhiṃ gaṇhāti . sukhāya vedanāya sampayuttaṃ sīlaṃ ... sutaṃ cāgaṃ paññaṃ rāgaṃ mohaṃ mānaṃ diṭṭhiṃ patthanaṃ ... sukhasahagataṃ kāyaviññāṇaṃ upanissāya adukkhamasukhāya vedanāya sampayuttena cittena dānaṃ deti. {1171.1} Saṅkhittaṃ . samāpattiṃ uppādeti adukkhamasukhāya vedanāya sampayuttena cittena adinnaṃ Ādiyati musā bhaṇati pisuṇaṃ bhaṇati pharusaṃ bhaṇati samphaṃ palapati sandhiṃ chindati nillopaṃ harati ekāgārikaṃ karoti paripanthe tiṭṭhati paradāraṃ gacchati gāmaghātaṃ karoti nigamaghātaṃ karoti . sukhāya vedanāya sampayuttā saddhā ... sīlaṃ sutaṃ cāgo paññā rāgo moho māno diṭṭhi patthanā ... sukhasahagataṃ kāyaviññāṇaṃ adukkhamasukhāya vedanāya sampayuttāya saddhāya sīlassa sutassa cāgassa paññāya rāgassa mohassa mānassa diṭṭhiyā patthanāya sukhasahagatassa kāyaviññāṇassa adukkhamasukhāya vedanāya sampayuttakānaṃ khandhānaṃ upanissayapaccayena paccayo.

[1172] Dukkhāya vedanāya sampayutto dhammo dukkhāya vedanāya sampayuttassa dhammassa upanissayapaccayena paccayo anantarūpanissayo pakatūpanissayo . pakatūpanissayo: dosaṃ upanissāya pāṇaṃ hanati dukkhāya vedanāya sampayuttena cittena adinnaṃ ādiyati . saṅkhittaṃ. Saṅghaṃ bhindati . mohaṃ dukkhasahagataṃ kāyaviññāṇaṃ upanissāya pāṇaṃ hanati dukkhāya vedanāya sampayuttena cittena adinnaṃ ādiyati . Saṅkhittaṃ . saṅghaṃ bhindati . doso moho dukkhasahagataṃ kāyaviññāṇaṃ dosassa mohassa dukkhasahagatassa kāyaviññāṇassa dukkhāya vedanāya sampayuttakānaṃ khandhānaṃ upanissayapaccayena paccayo.