[1385] Vipāko dhammo vipākassa dhammassa kammapaccayena paccayo vipākā cetanā sampayuttakānaṃ khandhānaṃ kammapaccayena paccayo paṭisandhikkhaṇe vipākā cetanā . vipāko dhammo nevavipākanavipākadhammadhammassa kammapaccayena paccayo vipākā cetanā cittasamuṭṭhānānaṃ rūpānaṃ kammapaccayena paccayo paṭisandhikkhaṇe vipākā cetanā kaṭattārūpānaṃ . vipāko dhammo vipākadhammadhammassa ca nevavipākanavipākadhammadhammassa ca dhammassa kammapaccayena paccayo vipākā cetanā sampayuttakānaṃ khandhānaṃ cittasamuṭṭhānānañca rūpānaṃ paṭisandhikkhaṇe vipākā cetanā sampayuttakānaṃ khandhānaṃ kaṭattā ca rūpānaṃ.

[1386] Vipākadhammadhammo vipākadhammadhammassa kammapaccayena paccayo vipākadhammadhammā cetanā sampayuttakānaṃ khandhānaṃ . Vipākadhammadhammo vipākassa dhammassa kammapaccayena paccayo nānākhaṇikā: vipākadhammadhammā cetanā vipākānaṃ khandhānaṃ kammapaccayena paccayo . vipākadhammadhammo nevavipākanavipākadhammadhammassa kammapaccayena paccayo sahajātā nānākhaṇikā . sahajātā: vipākadhammadhammā cetanā cittasamuṭṭhānānaṃ rūpānaṃ . nānākhaṇikā: vipākadhammadhammā cetanā kaṭattārūpānaṃ . vipākadhammadhammo vipākassa ca nevavipākanavipākadhammadhammassa ca nānākhaṇikā: vipākadhammadhammā cetanā vipākānaṃ khandhānaṃ kaṭattā ca rūpānaṃ kammapaccayena paccayo. {1386.1} Vipākadhammadhammo vipākadhammadhammassa ca nevavipāka- navipākadhammadhammassa ca dhammassa kammapaccayena paccayo vipākadhammadhammā cetanā sampayuttakānaṃ khandhānaṃ cittasamuṭṭhānānañca rūpānaṃ kammapaccayena paccayo.

[1387] Nevavipākanavipākadhammadhammo nevavipākanavipākadhammadhammassa kammapaccayena paccayo nevavipākanavipākadhammadhammā cetanā sampayuttakānaṃ khandhānaṃ cittasamuṭṭhānānañca rūpānaṃ.

[1388] Vipāko dhammo vipākassa dhammassa vipākapaccayena paccayo vipāko eko khandho tiṇṇaṃ khandhānaṃ paṭisandhikkhaṇe ... . Vipāko dhammo nevavipākanavipākadhammadhammassa vipākapaccayena paccayo vipākā khandhā cittasamuṭṭhānānaṃ rūpānaṃ paṭisandhikkhaṇe vipākā khandhā kaṭattārūpānaṃ . vipāko dhammo vipākassa ca nevavipākanavipākadhammadhammassa ca dhammassa vipākapaccayena paccayo vipāko eko khandho tiṇṇaṃ khandhānaṃ cittasamuṭṭhānānañca rūpānaṃ paṭisandhikkhaṇe vipāko eko khandho tiṇṇaṃ khandhānaṃ kaṭattā ca rūpānaṃ vipākapaccayena paccayo . vipāko dhammo vipākassa dhammassa āhārapaccayena paccayo vipākā āhārā sampayuttakānaṃ khandhānaṃ tīṇi . paṭisandhipi imesaṃ tiṇṇannaṃ kātabbaṃ . vipākadhammadhammo vipākadhammadhammassa āhārapaccayena paccayo tīṇi.