[1389] Nevavipākanavipākadhammadhammo nevavipākanavipākadhammadhammassa Āhārapaccayena paccayo nevavipākanavipākadhammadhammā āhārā sampayuttakānaṃ khandhānaṃ cittasamuṭṭhānānañca rūpānaṃ āhārapaccayena paccayo kabaḷiṃkāro āhāro imassa kāyassa āhārapaccayena paccayo.

[1390] Vipāko dhammo vipākassa dhammassa indriyapaccayena paccayo tīṇi . paṭisandhi kātabbaṃ . vipākadhammadhammo vipākadhammadhammassa indriyapaccayena paccayo tīṇi.

[1391] Nevavipākanavipākadhammadhammo nevavipākanavipākadhammadhammassa indriyapaccayena paccayo nevavipākanavipākadhammadhammā indriyā sampayuttakānaṃ khandhānaṃ cittasamuṭṭhānānañca rūpānaṃ rūpajīvitindriyaṃ kaṭattārūpānaṃ indriyapaccayena paccayo . Nevavipākanavipākadhammadhammo vipākassa dhammassa indriyapaccayena paccayo cakkhundriyaṃ cakkhuviññāṇassa indriyapaccayena paccayo. Kāyindriyaṃ .pe.

[1392] Vipāko ca nevavipākanavipākadhammadhammo ca dhammā vipākassa dhammassa indriyapaccayena paccayo cakkhundriyañca cakkhuviññāṇañca cakkhuviññāṇasahagatānaṃ khandhānaṃ indriyapaccayena paccayo .pe. kāyindriyañca kāyaviññāṇañca kāyaviññāṇasahagatānaṃ khandhānaṃ indriyapaccayena paccayo.