[1403] Vipāko ca nevavipākanavipākadhammadhammo ca dhammā vipākassa dhammassa atthipaccayena paccayo sahajātaṃ purejātaṃ . Sahajāto: cakkhuviññāṇasahagato eko khandho ca cakkhāyatanañca tiṇṇannaṃ .pe. kāyaviññāṇasahagato vipāko eko khandho ca vatthu ca tiṇṇannaṃ khandhānaṃ paṭisandhikkhaṇe vipāko eko khandho ca vatthu ca tiṇṇannaṃ . vipāko ca nevavipākanavipākadhammadhammo ca dhammā nevavipākanavipākadhammadhammassa atthipaccayena paccayo sahajātaṃ pacchājātaṃ āhāraṃ indriyaṃ . sahajātā: vipākā khandhā ca mahābhūtā ca cittasamuṭṭhānānaṃ rūpānaṃ paṭisandhikkhaṇe vipākā khandhā ca mahābhūtā . kaṭattārūpānaṃ atthipaccayena paccayo . Pacchājātā: vipākā khandhā ca kabaḷiṃkāro āhāro ca imassa kāyassa . pacchājātā: vipākā khandhā ca rūpajīvitindriyañca kaṭattārūpānaṃ.

[1404] Vipākadhammadhammo ca nevavipākanavipākadhammadhammo ca dhammā vipākadhammadhammassa atthipaccayena paccayo sahajātaṃ purejātaṃ . sahajāto: vipākadhammadhammo eko khandho ca vatthu ca tiṇṇannaṃ . vipākadhammadhammo ca nevavipākanavipākadhammadhammo ca dhammā nevavipākanavipākadhammadhammassa atthipaccayena paccayo sahajātaṃ pacchājātaṃ āhāraṃ indriyaṃ . sahajātā: vipākadhammadhammā khandhā ca mahābhūtā ca cittasamuṭṭhānānaṃ rūpānaṃ . pacchājātā: vipākadhammadhammā khandhā ca kabaḷiṃkāro āhāro ca purejātassa imassa kāyassa atthipaccayena paccayo . pacchājātā: vipākadhammadhammā khandhā ca rūpajīvitindriyañca kaṭattārūpānaṃ . vipāko dhammo natthivigataṃ anantarasadisaṃ avigataṃ atthisadisaṃ.

[1405] Hetuyā satta ārammaṇe nava adhipatiyā dasa anantare satta samanantare satta sahajāte ekādasa aññamaññe satta nissaye terasa upanissaye nava purejāte tīṇi pacchājāte tīṇi āsevane dve kamme nava vipāke tīṇi āhāre satta indriye nava jhāne satta magge satta sampayutte tīṇi vippayutte pañca atthiyā terasa natthiyā satta vigate satta avigate terasa.