[1664] Saṅkiliṭṭhasaṅkilesikañca asaṅkiliṭṭhasaṅkilesikañca dhammaṃ paṭicca asaṅkiliṭṭhasaṅkilesiko dhammo uppajjati hetupaccayā saṅkiliṭṭhasaṅkilesike khandhe ca mahābhūte ca paṭicca cittasamuṭṭhānaṃ rūpaṃ. Saṅkhittaṃ.

[1665] Hetuyā nava ārammaṇe tīṇi . saṅkhittaṃ . vipāke pañca avigate nava. Yathā kusalattike vibhattaṃ evaṃ vibhajitabbaṃ.

[1666] Saṅkiliṭṭhasaṅkilesikaṃ dhammaṃ paṭicca saṅkiliṭṭhasaṅkilesiko dhammo uppajjati nahetupaccayā vicikicchāsahagate uddhaccasahagate khandhe paṭicca vicikicchāsahagato uddhaccasahagato moho.

[1667] Asaṅkiliṭṭhasaṅkilesikaṃ dhammaṃ paṭicca asaṅkiliṭṭhasaṅkilesiko dhammo uppajjati nahetupaccayā ahetukaṃ asaṅkiliṭṭhasaṅkilesikaṃ ekaṃ khandhaṃ paṭicca tayo khandhā cittasamuṭṭhānañca rūpaṃ ahetukapaṭisandhikkhaṇe asaññasattānaṃ ekaṃ mahābhūtaṃ ... . saṅkhittaṃ . Yathā kusalattike vibhattaṃ evaṃ vibhajitabbaṃ. Nahetuyā dve naārammaṇe pañca naadhipatiyā cha. Saṅkhittaṃ. Hetupaccayā naārammaṇe pañca. Saṅkhittaṃ. Nahetupaccayā ārammaṇe dve. Saṅkhittaṃ. Sahajātavāropi paccayanissayasaṃsaṭṭhasampayuttavāropi vitthāretabbo.