[1676] Saṅkiliṭṭhasaṅkilesiko dhammo asaṅkiliṭṭhasaṅkilesikassa dhammassa ārammaṇapaccayena paccayo ariyā pahīne kilese paccavekkhanti vikkhambhite kilese paccavekkhanti pubbe samudāciṇṇe kilese jānanti saṅkiliṭṭhasaṅkilesike khandhe aniccato dukkhato anattato vipassanti cetopariyañāṇena saṅkiliṭṭhasaṅkilesikacittasamaṅgissa cittaṃ jānanti sekkhā vā puthujjanā vā saṅkiliṭṭhasaṅkilesike khandhe aniccato dukkhato anattato vipassanti kusale niruddhe vipāko tadārammaṇatā uppajjati saṅkiliṭṭhasaṅkilesike khandhe assādenti abhinandanti domanassaṃ uppajjati akusale niruddhe vipāko tadārammaṇatā uppajjati saṅkiliṭṭhasaṅkilesikā khandhā cetopariyañāṇassa pubbenivāsānussatiñāṇassa yathākammūpagañāṇassa anāgataṃsañāṇassa āvajjanāya ārammaṇapaccayena paccayo.
[1677] Asaṅkiliṭṭhasaṅkilesiko dhammo asaṅkiliṭṭhasaṅkilesikassa dhammassa ārammaṇapaccayena paccayo dānaṃ datvā sīlaṃ Samādiyitvā uposathakammaṃ katvā taṃ paccavekkhati pubbe suciṇṇāni paccavekkhati jhānā vuṭṭhahitvā jhānaṃ paccavekkhati ariyā gotrabhuṃ paccavekkhanti vodānaṃ paccavekkhanti cakkhuṃ aniccato dukkhato anattato vipassanti sotaṃ ... ghānaṃ jivhaṃ kāyaṃ rūpe sadde gandhe rase phoṭṭhabbe vatthuṃ ... asaṅkiliṭṭhasaṅkilesike khandhe aniccato dukkhato anattato vipassanti dibbena cakkhunā rūpaṃ passanti dibbāya sotadhātuyā saddaṃ suṇanti cetopariyañāṇena asaṅkiliṭṭhasaṅkilesikacittasamaṅgissa cittaṃ jānanti ākāsānañcāyatanaṃ viññāṇañcāyatanassa ākiñcaññāyatanaṃ nevasaññānāsaññāyatanassa ārammaṇapaccayena paccayo rūpāyatanaṃ cakkhuviññāṇassa ārammaṇapaccayena paccayo .pe. phoṭṭhabbāyatanaṃ kāyaviññāṇassa ārammaṇapaccayena paccayo asaṅkiliṭṭhasaṅkilesikā khandhā iddhividhañāṇassa cetopariyañāṇassa pubbenivāsānussatiñāṇassa yathākammūpagañāṇassa anāgataṃsañāṇassa āvajjanāya ārammaṇapaccayena paccayo.
[1678] Asaṅkiliṭṭhasaṅkilesiko dhammo saṅkiliṭṭhasaṅkilesikassa dhammassa ārammaṇapaccayena paccayo dānaṃ datvā sīlaṃ samādiyitvā usothakammaṃ katvā taṃ assādeti abhinandati taṃ ārabbha rāgo uppajjati diṭṭhi uppajjati domanassaṃ uppajjati pubbe suciṇṇāni assādeti jhānā vuṭṭhahitvā jhānaṃ assādeti cakkhuṃ Assādeti ... phoṭṭhabbe ... Vatthuṃ ... Asaṅkiliṭṭhasaṅkilesike khandhe assādeti abhinandati taṃ ārabbha rāgo uppajjati domanassaṃ uppajjati.