[1683] Saṅkiliṭṭhasaṅkilesiko dhammo saṅkiliṭṭhasaṅkilesikassa ca asaṅkiliṭṭhasaṅkilesikassa ca dhammassa adhipatipaccayena paccayo . Sahajātādhipati: saṅkiliṭṭhasaṅkilesikādhipati sampayuttakānaṃ khandhānaṃ cittasamuṭṭhānānañca rūpānaṃ adhipatipaccayena paccayo.

[1684] Asaṅkiliṭṭhasaṅkilesiko dhammo asaṅkiliṭṭhasaṅkilesikassa dhammassa adhipatipaccayena paccayo ārammaṇādhipati sahajātādhipati . Ārammaṇādhipati: dānaṃ datvā sīlaṃ samādiyitvā uposathakammaṃ katvā taṃ garuṃ katvā paccavekkhati pubbe suciṇṇāni garuṃ katvā paccavekkhati jhānā vuṭṭhahitvā jhānaṃ garuṃ katvā paccavekkhati sekkhā gotrabhuṃ garuṃ katvā paccavekkhanti vodānaṃ garuṃ katvā paccavekkhanti . sahajātādhipati: asaṅkiliṭṭhasaṅkilesikādhipati sampayuttakānaṃ khandhānaṃ cittasamuṭṭhānānañca rūpānaṃ adhipatipaccayena paccayo.

[1685] Asaṅkiliṭṭhasaṅkilesiko dhammo saṅkiliṭṭhasaṅkilesikassa dhammassa adhipatipaccayena paccayo . ārammaṇādhipati: dānaṃ datvā sīlaṃ samādiyitvā uposathakammaṃ katvā taṃ garuṃ katvā assādeti Abhinandati taṃ garuṃ katvā rāgo uppajjati diṭṭhi uppajjati pubbe suciṇṇāni garuṃ katvā assādeti abhinandati jhānā vuṭṭhahitvā jhānaṃ garuṃ katvā assādeti abhinandati cakkhuṃ garuṃ katvā assādeti abhinandati phoṭṭhabbe ... vatthuṃ ... Asaṅkiliṭṭhasaṅkilesike khandhe garuṃ katvā assādeti abhinandati taṃ garuṃ katvā rāgo uppajjati diṭṭhi uppajjati.

[1686] Asaṅkiliṭṭhaasaṅkilesiko dhammo asaṅkiliṭṭhaasaṅkilesikassa dhammassa adhipatipaccayena paccayo ārammaṇādhipati sahajātādhipati . ārammaṇādhipati: nibbānaṃ maggassa phalassa adhipatipaccayena paccayo . sahajātādhipati: asaṅkiliṭṭhaasaṅkilesikādhipati sampayuttakānaṃ khandhānaṃ adhipatipaccayena paccayo.