[1691] Asaṅkiliṭṭhasaṅkilesiko dhammo asaṅkiliṭṭhasaṅkilesikassa dhammassa anantarapaccayena paccayo purimā purimā asaṅkiliṭṭhasaṅkilesikā khandhā pacchimānaṃ pacchimānaṃ asaṅkiliṭṭhasaṅkilesikānaṃ khandhānaṃ anantarapaccayena paccayo anulomaṃ gotrabhussa anulomaṃ vodānassa āvajjanā asaṅkiliṭṭhasaṅkilesikānaṃ khandhānaṃ anantarapaccayena paccayo.

[1692] Asaṅkiliṭṭhasaṅkilesiko dhammo saṅkiliṭṭhasaṅkilesikassa dhammassa anantarapaccayena paccayo āvajjanā saṅkiliṭṭhasaṅkilesikānaṃ khandhānaṃ anantarapaccayena paccayo.

[1693] Asaṅkiliṭṭhasaṅkilesiko dhammo asaṅkiliṭṭhaasaṅkilesikassa dhammassa anantarapaccayena paccayo gotrabhu maggassa vodānaṃ Maggassa anulomaṃ phalasamāpattiyā nirodhā vuṭṭhahantassa nevasaññānāsaññāyatanaṃ phalasamāpattiyā anantarapaccayena paccayo.

[1694] Asaṅkiliṭṭhaasaṅkilesiko dhammo asaṅkiliṭṭhaasaṅkilesikassa dhammassa anantarapaccayena paccayo purimā purimā asaṅkiliṭṭhaasaṅkilesikā khandhā pacchimānaṃ pacchimānaṃ asaṅkiliṭṭhaasaṅkilesikānaṃ khandhānaṃ anantarapaccayena paccayo maggo phalassa phalaṃ phalassa anantarapaccayena paccayo.