[592] Hetuyā nava ārammaṇe tīṇi adhipatiyā nava anantare tīṇi samanantare tīṇi sahajāte nava aññamaññe tīṇi nissaye nava upanissaye tīṇi purejāte tīṇi āsevane tīṇi kamme nava vipāke ekaṃ āhāre nava indriye nava jhāne nava magge nava sampayutte tīṇi vippayutte nava atthiyā nava natthiyā tīṇi vigate tīṇi avigate nava. Imāni padāni anumajjantena anulomaṃ gaṇetabbaṃ. Anulomaṃ.

[593] Dassanenapahātabbaṃ dhammaṃ paṭicca dassanenapahātabbo dhammo uppajjati nahetupaccayā vicikicchāsahagate khandhe paṭicca vicikicchāsahagato moho.

[594] Bhāvanāyapahātabbaṃ dhammaṃ paṭicca bhāvanāyapahātabbo dhammo uppajjati nahetupaccayā uddhaccasahagate khandhe paṭicca uddhaccasahagato moho.

[595] Nevadassanenanabhāvanāyapahātabbaṃ dhammaṃ paṭicca nevadassanenanabhāvanāyapahātabbo dhammo uppajjati nahetupaccayā ahetukaṃ nevadassanenanabhāvanāyapahātabbaṃ ekaṃ khandhaṃ paṭicca tayo khandhā cittasamuṭṭhānañca rūpaṃ dve khandhe paṭicca ahetukaṃ paṭisandhikkhaṇe nevadassanenanabhāvanāyapahātabbaṃ ekaṃ khandhaṃ paṭicca tayo khandhā kaṭattā ca rūpaṃ dve khandhe paṭicca dve khandhā khandhe paṭicca vatthu vatthuṃ paṭicca khandhā ekaṃ mahābhūtaṃ paṭicca tayo mahābhūtā mahābhūte paṭicca cittasamuṭṭhānaṃ rūpaṃ kaṭattārūpaṃ upādārūpaṃ bāhiraṃ ... āhārasamuṭṭhānaṃ ... utusamuṭṭhānaṃ ... asaññasattānaṃ ekaṃ mahābhūtaṃ paṭicca tayo mahābhūtā mahābhūte paṭicca kaṭattārūpaṃ upādārūpaṃ.