[908] Bhāvanāyapahātabbahetuko dhammo bhāvanāyapahātabbahetukassa dhammassa anantarapaccayena paccayo purimā purimā bhāvanāyapahātabbahetukā khandhā pacchimānaṃ pacchimānaṃ bhāvanāyapahātabbahetukānaṃ khandhānaṃ anantarapaccayena paccayo.

[909] Bhāvanāyapahātabbahetuko dhammo nevadassanenanabhāvanāya- pahātabbahetukassa dhammassa ... purimā purimā uddhaccasahagatā khandhā pacchimassa pacchimassa mohassa anantarapaccayena paccayo bhāvanāyapahātabbahetukā khandhā vuṭṭhānassa anantarapaccayena paccayo.

[910] Bhāvanāyapahātabbahetuko dhammo bhāvanāyapahātabbahetukassa ca nevadassanenanabhāvanāyapahātabbahetukassa ca dhammassa ... purimā purimā uddhaccasahagatā khandhā pacchimānaṃ pacchimānaṃ uddhaccasahagatānaṃ khandhānaṃ mohassa ca anantarapaccayena paccayo.

[911] Nevadassanenanabhāvanāyapahātabbahetuko dhammo nevadassanenanabhāvanāyapahātabbahetukassa dhammassa ... purimo purimo Vicikicchāsahagato uddhaccasahagato moho pacchimassa pacchimassa vicikicchāsahagatassa uddhaccasahagatassa mohassa anantarapaccayena paccayo purimā purimā nevadassanenanabhāvanāyapahātabbahetukā khandhā pacchimānaṃ pacchimānaṃ nevadassanenanabhāvanāyapahātabbahetukānaṃ khandhānaṃ anantarapaccayena paccayo anulomaṃ gotrabhussa anulomaṃ vodānassa . saṅkhittaṃ . nirodhā vuṭṭhahantassa nevasaññānāsaññāyatanaṃ phalasamāpattiyā anantarapaccayena paccayo.