[1115] Ācayagāmi dhammo nevācayagāmināpacayagāmissa dhammassa upanissayapaccayena paccayo anantarūpanissayo pakatūpanissayo . Pakatūpanissayo: ācayagāmiṃ saddhaṃ upanissāya attānaṃ ātāpeti paritāpeti pariyiṭṭhimūlakaṃ dukkhaṃ paccanubhoti ācayagāmiṃ sīlaṃ ... paññaṃ rāgaṃ ... patthanaṃ upanissāya attānaṃ ātāpeti paritāpeti pariyiṭṭhimūlakaṃ dukkhaṃ paccanubhoti ācayagāmi saddhā ... paññā rāgo ... Patthanā kāyikassa sukhassa kāyikassa dukkhassa phalasamāpattiyā upanissayapaccayena paccayo kusalākusalaṃ kammaṃ vipākassa upanissayapaccayena paccayo.

[1116] Apacayagāmi dhammo apacayagāmissa dhammassa upanissayapaccayena paccayo . pakatūpanissayo: paṭhamo maggo dutiyassa maggassa tatiyo maggo catutthassa maggassa upanissayapaccayena paccayo.

[1117] Apacayagāmi dhammo ācayagāmissa dhammassa ... Ārammaṇūpanissayo pakatūpanissayo . pakatūpanissayo: sekkhā maggaṃ upanissāya anuppannaṃ samāpattiṃ uppādenti uppannaṃ samāpajjanti saṅkhāre aniccato dukkhato anattato vipassanti maggo sekkhānaṃ Atthapaṭisambhidāya dhammapaṭisambhidāya niruttipaṭisambhidāya paṭibhāṇapaṭisambhidāya ṭhānāṭhānakosallassa upanissayapaccayena paccayo.

[1118] Apacayagāmi dhammo nevācayagāmināpacayagāmissa dhammassa ... ārammaṇūpanissayo anantarūpanissayo pakatūpanissayo . Pakatūpanissayo: arahā maggaṃ upanissāya anuppannaṃ kiriyasamāpattiṃ uppādeti uppannaṃ samāpajjati ... Ṭhānāṭhānakosallassa upanissayapaccayena paccayo maggo phalasamāpattiyā upanissayapaccayena paccayo.