[1233] Sekkho dhammo sekkhassa dhammassa hetupaccayena paccayo sekkhā hetū sampayuttakānaṃ khandhānaṃ hetupaccayena paccayo.

[1234] Sekkho dhammo nevasekkhānāsekkhassa dhammassa hetupaccayena paccayo sekkhā hetū cittasamuṭṭhānānaṃ rūpānaṃ hetupaccayena paccayo.

[1235] Sekkho dhammo sekkhassa ca nevasekkhānāsekkhassa ca dhammassa hetupaccayena paccayo sekkhā hetū sampayuttakānaṃ khandhānaṃ cittasamuṭṭhānānañca rūpānaṃ hetupaccayena paccayo.

[1236] Asekkho dhammo asekkhassa dhammassa ... tīṇi . Nevasekkhānāsekkho dhammo nevasekkhānāsekkhassa dhammassa hetupaccayena paccayo nevasekkhānāsekkhā hetū sampayuttakānaṃ khandhānaṃ cittasamuṭṭhānānañca rūpānaṃ hetupaccayena paccayo paṭisandhikkhaṇe ....