[1245] Asekkho dhammo asekkhassa dhammassa adhipatipaccayena paccayo . sahajātādhipati: asekkhādhipati sampayuttakānaṃ khandhānaṃ adhipatipaccayena paccayo.

[1246] Asekkho dhammo nevasekkhānāsekkhassa dhammassa adhipatipaccayena paccayo ārammaṇādhipati sahajātādhipati . Ārammaṇādhipati: arahā asekkhaṃ phalaṃ garuṃ katvā paccavekkhati . sahajātādhipati: asekkhādhipati cittasamuṭṭhānānaṃ rūpānaṃ adhipatipaccayena paccayo.

[1247] Asekkho dhammo asekkhassa ca nevasekkhānāsekkhassa ca dhammassa adhipatipaccayena paccayo . sahajātādhipati: asekkhādhipati sampayuttakānaṃ khandhānaṃ cittasamuṭṭhānānañca rūpānaṃ adhipatipaccayena paccayo.

[1248] Nevasekkhānāsekkho dhammo nevasekkhānāsekkhassa dhammassa ... ārammaṇādhipati sahajātādhipati . ārammaṇādhipati: dānaṃ datvā sīlaṃ samādiyitvā uposathakammaṃ katvā taṃ garuṃ katvā paccavekkhati pubbe suciṇṇāni garuṃ katvā paccavekkhati jhānā Vuṭṭhahitvā jhānaṃ garuṃ katvā paccavekkhati ariyā nibbānaṃ garuṃ katvā paccavekkhanti nibbānaṃ gotrabhussa vodānassa adhipatipaccayena paccayo cakkhuṃ garuṃ katvā assādeti abhinandati taṃ garuṃ katvā rāgo uppajjati diṭṭhi uppajjati sotaṃ ... vatthuṃ ... Nevasekkhānāsekkhe khandhe garuṃ katvā assādeti abhinandati taṃ garuṃ katvā rāgo uppajjati diṭṭhi uppajjati . sahajātādhipati: nevasekkhānāsekkhādhipati sampayuttakānaṃ khandhānaṃ cittasamuṭṭhānānañca rūpānaṃ adhipatipaccayena paccayo.