[1422] Paritto dhammo mahaggatassa dhammassa ārammaṇapaccayena paccayo dibbena cakkhunā rūpaṃ passati dibbāya sotadhātuyā saddaṃ ... Cetopariyañāṇena parittacittasamaṅgissa cittaṃ jānāti parittā khandhā iddhividhañāṇassa cetopariyañāṇassa pubbenivāsānussatiñāṇassa yathākammūpagañāṇassa anāgataṃsañāṇassa ārammaṇapaccayena paccayo.

[1423] Mahaggato dhammo mahaggatassa dhammassa ārammaṇapaccayena paccayo ākāsānañcāyatanaṃ viññāṇañcāyatanassa ākiñcaññāyatanaṃ nevasaññānāsaññāyatanassa ārammaṇapaccayena Paccayo cetopariyañāṇena mahaggatacittasamaṅgissa cittaṃ jānāti mahaggatā khandhā iddhividhañāṇassa cetopariyañāṇassa pubbenivāsānussatiñāṇassa yathākammūpagañāṇassa anāgataṃsañāṇassa ārammaṇapaccayena paccayo.

[1424] Mahaggato dhammo parittassa dhammassa ārammaṇapaccayena paccayo paṭhamaṃ jhānaṃ paccavekkhati nevasaññānāsaññāyatanaṃ paccavekkhati dibbaṃ cakkhuṃ paccavekkhati dibbaṃ sotadhātuṃ ... Iddhividhañāṇaṃ paccavekkhati cetopariyañāṇaṃ ... Pubbenivāsānussatiñāṇaṃ ... Yathākammūpagañāṇaṃ ... anāgataṃsañāṇaṃ paccavekkhati mahaggate khandhe aniccato ... vipassati assādeti abhinandati taṃ ārabbha rāgo uppajjati domanassaṃ uppajjati.

[1425] Appamāṇo dhammo appamāṇassa dhammassa ārammaṇapaccayena paccayo nibbānaṃ maggassa phalassa ārammaṇapaccayena paccayo.