[1567] Parittārammaṇo dhammo parittārammaṇassa dhammassa hetupaccayena paccayo parittārammaṇā hetū sampayuttakānaṃ khandhānaṃ hetupaccayena paccayo paṭisandhikkhaṇe parittārammaṇā hetū sampayuttakānaṃ khandhānaṃ hetupaccayena paccayo.

[1568] Mahaggatārammaṇo dhammo mahaggatārammaṇassa dhammassa hetupaccayena paccayo mahaggatārammaṇā hetū sampayuttakānaṃ khandhānaṃ hetupaccayena paccayo paṭisandhikkhaṇe ....

[1569] Appamāṇārammaṇo dhammo appamāṇārammaṇassa dhammassa hetupaccayena paccayo appamāṇārammaṇā hetū sampayuttakānaṃ khandhānaṃ hetupaccayena paccayo.

[1570] Parittārammaṇo dhammo parittārammaṇassa dhammassa ārammaṇapaccayena paccayo dānaṃ datvā sīlaṃ samādiyitvā uposathakammaṃ katvā taṃ paccavekkhati pubbe suciṇṇāni paccavekkhati ariyā parittārammaṇe pahīne kilese paccavekkhanti vikkhambhite kilese paccavekkhanti pubbe samudāciṇṇe kilese jānanti parittārammaṇe paritte khandhe aniccato dukkhato anattato vipassanti assādenti abhinandanti taṃ ārabbha parittārammaṇo rāgo uppajjati domanassaṃ uppajjati cetopariyañāṇena parittārammaṇa- parittacittasamaṅgissa cittaṃ jānāti parittārammaṇā parittā khandhā Cetopariyañāṇassa pubbenivāsānussatiñāṇassa yathākammūpagañāṇassa anāgataṃsañāṇassa āvajjanāya ārammaṇapaccayena paccayo.