[1640] Hetuyā nava ārammaṇe tīṇi adhipatiyā nava anantare tīṇi samanantare tīṇi sahajāte nava aññamaññe tīṇi nissaye nava upanissaye tīṇi purejāte tīṇi āsevane tīṇi kamme nava vipāke ekaṃ āhāre nava indriye nava jhāne nava magge nava sampayutte tīṇi vippayutte nava atthiyā nava natthiyā tīṇi vigate tīṇi avigate nava . evaṃ gaṇetabbaṃ. Anulomaṃ.

[1641] Aniyataṃ dhammaṃ paṭicca aniyato dhammo uppajjati nahetupaccayā ahetukaṃ aniyataṃ ekaṃ khandhaṃ paṭicca tayo khandhā cittasamuṭṭhānañca rūpaṃ dve khandhe ... ahetukapaṭisandhikkhaṇe ekaṃ mahābhūtaṃ paṭicca bāhiraṃ ... āhāra ... Utu ... Asaññasattānaṃ ... Vicikicchāsahagate uddhaccasahagate khandhe paṭicca vicikicchāsahagato uddhaccasahagato moho.

[1642] Micchattaniyataṃ dhammaṃ paṭicca aniyato dhammo uppajjati naārammaṇapaccayā micchattaniyate khandhe paṭicca cittasamuṭṭhānaṃ rūpaṃ. Saṅkhittaṃ.

[1643] Micchattaniyataṃ dhammaṃ paṭicca micchattaniyato dhammo uppajjati naadhipatipaccayā micchattaniyate khandhe paṭicca micchattaniyatā adhipati.