[1695] Aniyato dhammo micchattaniyatassa dhammassa ārammaṇapaccayena paccayo rūpajīvitindriyaṃ mātughātakammassa pitughātakammassa Arahantaghātakammassa ruhiruppādakammassa ārammaṇapaccayena paccayo yaṃ vatthuṃ parāmasantassa micchattaniyatā khandhā uppajjanti taṃ vatthuṃ micchattaniyatānaṃ khandhānaṃ ārammaṇapaccayena paccayo.

[1696] Aniyato dhammo sammattaniyatassa dhammassa ārammaṇapaccayena paccayo nibbānaṃ maggassa ārammaṇapaccayena paccayo.

[1697] Micchattaniyato dhammo micchattaniyatassa dhammassa adhipatipaccayena paccayo . sahajātādhipati: micchattaniyatādhipati sampayuttakānaṃ khandhānaṃ adhipatipaccayena paccayo.

[1698] Micchattaniyato dhammo aniyatassa dhammassa adhipatipaccayena paccayo . sahajātādhipati: micchattaniyatādhipati cittasamuṭṭhānānaṃ rūpānaṃ adhipatipaccayena paccayo.